މިއީ ފަހުގެ ތާރީހެއްގައި މީހެއްގެ މިލްކިއްޔާތުން މިހާ ކުރު މުއްދަތެއްގެ ތެރޭގައި މިހާ ބޮޑު އަދަދެއް ދަށްވި ފުރަތަމަ ފަހަރެވެ.
އިލޮން މަސްކްގެ މިލްކިއްޔާތަށް މިހާ ބޮޑު ލޮޅުމެއް އައީ އޭނާގެ ހިއްސާ އޮންނަ އެންމެ ބޮޑު ދެ ކުންފުނި ކަމަށްވާ ޓެސްލާ އާއި ސްޕޭސްއެކްސްގެ ހިއްސާގެ އަގު މާކެޓުގައި ބޮޑުތަނުން ވެއްޓުމާ ގުޅިގެންނެވެ. ހާއްސަކޮށް ޓެސްލާގެ ހިއްސާގެ އަގަށް އައި ބަދަލުތަކުގެ ސަބަބުން މަސްކްގެ މާލީ ހާލަތަށް ވަނީ ބޮޑު އަސަރެއް ކޮށްފަ އެވެ.
މިދިޔަ ޖޫން މަހުގެ 16 ވަނަ ދުވަހު ސްޕޭސްއެކްސްގެ ހިއްސާގެ އަގު މަތިވުމާއެކު އިލޮން މަސްކްގެ މިލްކިއްޔާތު ވަނީ 1.33 ޓްރިލިއަން ޑޮލަރަށް އަރައިފައެވެ. އެއާއެކު އޭނާ ވެގެންދިޔައީ ދުނިޔޭގެ ތާރީހުގައި ވެސް އުފެދުނު ފުރަތަމަ ޓްރިލިއަނަރަށެވެ. ނަމަވެސް އެ އަދަދު މިހާރު ވަނީ 684 ބިލިއަން ޑޮލަރަށް ދަށްވެފަ އެވެ.
މިލްކިއްޔާތުން މިހާ ބޮޑު އަދަދެއް މަދުވި ނަމަވެސް، އިލޮން މަސްކް ދަނީ އާ ޓެކްނޮލޮޖީތަކަށް ކުރާ އިންވެސްޓްމަންޓްތައް އިތުރުކުރަމުންނެވެ. އެގޮތުން އާޓިފިޝަލް އިންޓެލިޖެންސް (އޭއައި) އާއި، އަމިއްލައަށް ދުއްވާ އުޅަނދުފަހަރާއި، ރޮބޯޓިކްސްގެ ދާއިރާއަށް ކުރާ ހަރަދުތައް މަޑުޖައްސައިނުލާ ކުރިއަށްގެންދިއުމަށް އޭނާ ވަނީ ނިންމައިފަ އެވެ.
މާކެޓު ދިރާސާކުރާ ފަރާތްތަކުން ބުނާ ގޮތުގައި ޓެކްނޮލޮޖީ ދާއިރާގެ ކުންފުނިތަކުގެ ހިއްސާގެ އަގަށް މިއީ އާންމުކޮށް އަންނަ ބަދަލުތަކެކެވެ. އަދި މަސްކްގެ މި ނިންމުންތަކާއެކު ކުރިއަށް އޮތް ތަނުގައި އޭނާގެ ކުންފުނިތަކުގެ އަގު އަލުން މަތިވެ، މިލްކިއްޔާތު އިތުރުވެގެންދާނެ ކަމަށް މާހިރުން އަންދާޒާކުރެ އެވެ.
