ވަޒީރުންގެ މަޖިލީހުން މިގޮތަށް ނިންމެވީ އިއްޔެ ކުރިއަށްގެންދެވި އެ މަޖިލީހުގެ ޖަލްސާގައި، މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ހުށަހެޅުއްވި ހުށަހެޅުއްވުމާ ގުޅިގެންނެވެ.
ރައީސްގެ އޮފީހުން ބުނީ ރާއްޖޭގެ ސަރަޙައްދުން ދިރުން ނެތް ޤުދުރަތީ ވަސީލަތްތައް ހޯދައި ނެގުމާއި އެކަމާ ގުޅޭ ހަރަކާތްތައް ކުރިއަށް ގެންދިއުމަށްޓަކައި އެ ވުޒާރާއާއި ކަމާގުޅޭ އެހެނިހެން އިދާރާތަކުން ފުރިހަމަކުރަންޖެހޭ އެންމެހާ ކަންކަން ފެއްޓެވުމަށް ވަޒީރުންގެ މަޖިލީހުން ނިންމަވާފައިވާ ކަމަށެވެ.
މިކަމާ ގުޅޭ މާ ބޮޑު ތަފްސީލެއް ރައީސް އޮފީހުން އަދި ހާމައެއް ނުކުރެ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ތެޔޮ ހޯދުމަށް ބޭރުގެ ކުންފުންޏަކާ ހަވާލުކޮށް މަސައްކަތް ވެސް ކުރި އެވެ.
ޖަރުމަނުގެ ޔުނިވާސިޓީ އޮފް ހެމްބާގްގެ ސައިންސްވެރިން 2014ގައި ރާއްޖޭގައި ކުރި ދިރާސާގެ ނަތީޖާ ހޯދުމަށް ފަހު އޭރުގެ ފިޝަރީޒް މިނިސްޓަރު މުހައްމަދު ޝައިނީ އޭރު ވިދާޅުވެފައި ވަނީ ޖިއޮލޮޖިކަލް ސާވޭތަކުން ދައްކާ ގޮތުން ރާއްޖޭގެ ސަރަހައްދުގެ ބިމުގެ އަޑިން "ފުލުއިޑެއް ނުވަތަ ގޭސް" އަރާ ކަމުގެ ހެކިތައް ފެނިފައިވާ ކަމަށެވެ.
