ކޮމިޝަނަރ އޮފް ޕޮލިސް ނެރުއްވި މެސެޖެއްގައި ބަޔާންކުރައްވާފައިވާ ގޮތުގައި، މަގުމަތީގެ އުސޫލުތަކަށް ބޯނުލަބާ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި، ނުރައްކާތެރި އެކިއެކި ހާދިސާތައް ތަކުރާރުކޮށް ހިނގަމުންދެއެވެ.
އެހެންކަމުން، ގަވާއިދާ ތަކުރާރުކޮށް ހިލާފުވާ ފަރާތްތަކާމެދު ހާއްސަ ފިޔަވަޅުތަކެއް އަޅަމުންދާނެކަން އެންމެހާ ދިވެހި ރައްޔިތުންގެ ސަމާލުކަމަށްޓަކައި ވަނީ ދަންނަވާފައެވެ.
މި ފިޔަވަޅުތައް އެޅުމުގެ މައިގަނޑު މަގުސަދަކީ މަގުތަކަކީ އެންމެހާ ރައްޔިތުންނަށްވެސް ރައްކާތެރި، އަމާން ތަނެއްގެ ގޮތުގައި ބޭއްވުމާއި، މަދު ބައެއްގެ އިހުމާލުން ހިނގާ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަމަށް ސީޕީގެ މެސެޖުގައި ވިދާޅުވެފައި ވެއެވެ.
ކޮމިޝަނަރ އޮފް ޕޮލިސް އިތުރަށް ވިދާޅުވި ގޮތުގައި، ކަމާގުޅުންހުރި އެންމެހާ މުއައްސަސާތަކާ ގުޅިގެން އެންމެ މަތީ ދަރަޖައެއްގައި މި ފިޔަވަޅުތައް އަޅަމުން ދިއުމަށް ފުލުހުންގެ ކަމާބެހޭ އެންމެހާ ބަހާތަކަށް މިހާރު ވަނީ އަންގަވާފަ އެވެ. އަދި މި ފިޔަވަޅުތައް ގްރޭޓަރ މާލެ އޭރިޔާގެ އިތުރުން އަތޮޅުތެރޭގެ ރަށްރަށުގައިވެސް އަޅަމުންދާނެ އެވެ.
މަގުމަތީގެ ރައްކާތެރިކަން ކަށަވަރުކުރުމަށްޓަކައި އަޅަމުންދާ މި ފިޔަވަޅުތަކަށް އެންމެހާ ފަރާތްތަކުގެ އެހީތެރިކަމާއި އެއްބާރުލުން ދިވެހި ފުލުހުންނަށް ދެއްވުމަށް ކޮމިޝަނަރ އޮފް ޕޮލިސް ވަނީ އިލްތިމާސްކުރައްވާފަ އެވެ.
