ކުވެއިތުގެ މިނިސްޓްރީ އޮފް އިންޓީރިއާއިން ހާމަކޮށްފައިވާ ގޮތުގައި، ހައްޔަރުކުރެވުނު ފަސް ފިރިހެނުން ވަނީ ގާނޫނީގޮތުން ހުއްދަދެވިފައިވާ އެހީދޭ މަޝްރޫއެއްގެ އޮފިޝަލް ވެބްސައިޓާއި ފޯނު ނަންބަރުގެ ބޭނުން ނާޖާއިޒު ގޮތުގައި ހިފާފައެވެ. އަދި އެހީ ދޭން ބޭނުންވާ މީހުންނަށް އޮޅުވާލައިގެން، އެ މީހުންގެ އަތުން ހެދުމާއި، އިލެކްޓްރޯނިކް ސާމާނުގެ އިތުރުން ނަގުދު ފައިސާވެސް އެއްކޮށްފައިވެއެވެ.
މި މީހުން ވަނީ އޮޅުވާލައިގެން ހޯދި ތަކެތި ކުވެއިތުގެ އެކި ސަރަހައްދުތަކުގައިވާ ކުދި ބާޒާރުތަކުގައި ވިއްކާފައެވެ. އަދި މިގޮތަށް ތަކެތި ވިއްކައިގެން އަމިއްލަ ފައިދާއަށް މަހަކު 60،000 (ފަސްދޮޅަސް ހާސް) ދީނާރުގެ އާމްދަނީއެއް އެ މީހުން ހޯދަމުންދިޔަ ކަމަށް ކުވެއިތުގެ މިނިސްޓްރީ އޮފް އިންޓީރިއާއިން މައުލޫމާތު ދެއެވެ.
މި މައްސަލައިގައި ހައްޔަރުކުރެވުނު ފަސް މީހުންނާމެދު ގާނޫނީ ފިޔަވަޅު އެޅުމުގެ މަސައްކަތް ކުވެއިތުގެ ކަމާބެހޭ އިދާރާތަކުން ދަނީ ކުރަމުންނެވެ.
