"ބޮޑު ބަދަލު"ގެ ނަމުގައި ގާނޫނުއަސާސީއަށް ބަދަލު ގެނައުމަށް މަސައްކަތް ކުރަން އެމްޑީޕީން ނިންމިއިރު ގާނޫނު އަސާސީ އިސްލާހުކޮށް ދައުލަތް ހިންގުމުގެ އޮނިގަނޑު އަލުން ތަރުތީބު ކުރުމަށް ގެނެވިދާނެ ބައެއް އިސްލާހުތައް "އެދޭ ރާއްޖެ" ހަރަކާތުން މިހާރު ވަނީ ރައްޔިތުންގެ ހިޔާލަށް ދޫކޮށްލައިފަ އެވެ.
މިހާރު ހުރި މައްސަލަތައް ހައްލުކުރުމަށް ގާނޫނުއަސާސީގެ 4 ވަނަ މާއްދާގައި ބުނާ ރައްޔިތުންގެ ބާރު ގައި "ކިކް" ކުރެވެން ޖެހެ އެވެ. ބޮޑުވަޒީރު ހުންނެވިޔަސް އަދި ރައީސުލްޖުމްހޫރިއްޔާ ހުންނެވިޔަސް އިހްލާސްތެރިކަާއި ތެދުވެރި ނިޔަތުގައި ރައްޔިތުންގެ ބާރު "ޕްރެކްޓިސް" ކުރަން ފުރުސަތު ނުލިބޭ ނަމަ ދެން ވެސް ފެންނަނީ މާޒީން ފެންނަމުންދިޔަ ފަދަ "ބައިގަނޑެއް"ގެ ހިންގުމެކެވެ.
އޭރުން އަނެއްކާ ވެސް ނިކުންނަށް ޖެހޭނީ އިއްޔެ ވެސް އަދި މިއަދު ވެސް ކުރަމުންދާ ހެޔޮ ހިންގުމެއް ހޯދުމުގެ މަސައްކަތެވެ. އެހެންކަމުން ދެން ނިކުންނަންވީ ގިނަ ބައެއްގެ އަތުގައި ބާރުގެ ތިލަފަތް ގިނަ ވަގުތު އޮންނާނެ ގޮތެއް ހޯދުމަށެވެ. ބޮޑެތި ކަންކަން ނިންމުގައި ރައްޔިތުންގެ ރުހުން ހޯދަން ލާޒިމް ކުރުމަށެވެ. ރައީސާއި މަޖިލީހުގެ މެމްބަރުން ވެސް ވަކި ކުރުމުގެ ސީދާ ބާރު ރައްޔިތުންގެ އަތުގައި އަބަދު ވެސް އޮންނާނެ އޮނިގަނޑެއް ހޯދުމަށް ދޯ އެވެ.
ރާއްޖޭގެ ވެރިކަން ހިންގުމުގެ ނިޒާމަށް ބޮޑެތި ބަދަލުތަކެއް ގެންނަން ޖެހޭ ކަމަށް ވިދާޅުވެ، ކުރީގެ ރައީސް މުހައްމަދު ނަޝީދާއި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވަނީ "ބޮޑު ބަދަލު"ގެ ނަމުގައި އިސްލާހީ މަގުޗާޓެއް އިއުލާން ކުރައްވައިފަ އެވެ.
އެ މަގުޗާޓަށް އެމްޑީޕީގެ ރުހުން ހޯދުމަށް ފައްޔާޒު ވަނީ ކޮންގްރެސްއަށް ގަރާރެއް ހުށަހަޅުއްވައިފަ އެވެ. އެ ގަރާރާ ގުޅޭ ގޮތުން މިއަދު ހަވީރު އެމްޑީޕީގެ ކޮންގްރެސްގައި ބަހުސްކުރިއިރު، ކޮންގްރެސްގައި ބައިވެރިވި ވަރަށް ގިނަ މަންދޫބުން ވަނީ ގަރާރަށް ތާއިދުކުރައްވައި، ރާއްޖެއަށް ބަދަލުތަކެއް ގެންނަން ޖެހިފައިވާ ކަމަށް ވިދާޅުވެފަ އެވެ.
ބަހުސަށް ފަހު ގަރާރަށް ވޯޓަށް އެހުމުން، ކޮންގްރެސްއަށް ހާޒިރުވެ ތިބި 563 މަންދޫބުންގެ ތެރެއިން 520 މަންދޫބުން ވަނީ އެ ގަރާރު ފާސްކުރަން ވޯޓު ދީފަ އެވެ. އެއާ އެކު، ކޮންގްރެސްއިން ވަނީ ގަރާރު ބަލައިގެންފަ އެވެ.
ގާނޫނުއަސާސީއަށް ގެނައުމަށް ފައްޔާޒުއާއި ނަޝީދު ހުށަހަޅާ ބަދަލުތަކުގެ ތެރެއިން ފާހަގަކޮށްލެވޭ ބައެއް ބަދަލުތަކަކީ:
ގާނޫނުއަސާސީއަށް ބަދަލެއް ގެނެވޭނީ ރައްޔިތުންގެ މަޖިލީހުގެ އިތުރުން ރައްޔިތުން އިންތިހާބުކުރާ ކައުންސިލަރުން ވެސް ހިމެނޭ ގޮތަށް އޮންނަ ހާއްސަ މަޖިލީހަކުން ކަމަށް ކަނޑައެޅުން؛ ބައެއް ބަދަލުތައް ރައްޔިތުންގެ ފެންނަ ނުފެންނަ ވޯޓަކުން ކުރެވޭ ގޮތަށް
ދައުލަތުގެ ކޮންމެ މަގާމަކަށް އިންތިހާބުކުރެވޭ ކޮންމެ މީހަކު ވެސް އެ މީހަކު އިންތިހާބުކުރެވިފައިވާ ދައުރުގެ މެދުތެރެއިން ވަކިކުރުމުގެ ފުރުސަތު އިންތިހާބުކުރި ރައްޔިތުންނަށް ލިބިދެވޭނެ ގޮތެއް ހަމަޖެއްސުން
އެ މީހަކު ރަޖިސްޓްރީވެފައިވާ ދާއިރާގެ ކައުންސިލަށް ވޯޓު ދިނުމުގެ ބަދަލުގައި އެ މީހަކު ދިރިއުޅޭ ދާއިރާގެ ކައުންސިލަށް ވޯޓު ދޭން ޖެހޭ ގޮތަށް ބަދަލުކުރުމަށް ކުރަން ޖެހޭ ދިރާސާތައް ކޮށްގެން އެ ބަދަލުތައް ގެނައުން
ރައްޔިތުންގެ މަޖިލީހަކީ ކޮންމެ އަތޮޅަކުންނާއި ކޮންމެ ސިޓީއަކުން ވޯޓުދީގެން އިންތިހާބުކުރެވޭ މެންބަރުންނަށް ހަދައި، މެންބަރުންގެ އަދަދު އިތުރުނުވާ ގޮތަށް ވަކި އަދަދެއްގައި ހިފެހެއްޓުން
ސުޕްރީމް ކޯޓުގެ ފަނޑިޔާރުން ވަކިކުރެވޭނީ ރައްޔިތުންގެ އާންމު ވޯޓަކުން ކަމަށް ކަނޑައަޅައި ސިޔާސީ މީހުންނާއި ސަރުކާރުގެ ނުފޫޒު ނޯންނަ ގޮތަކަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ އެކުވެލުން ބަދަލުކުރުން
މިނިވަން މުއައްސަސާތައް ޖަވާބުދާރީކުރުވާނެ ވަކި ހާއްސަ ކޮމިޝަނެއް އުފައްދައި އާންމުންގެ ތެރެއިން ކަނޑައެޅޭ މެންބަރުންތަކެއްގެ މައްޗަށް އެ ކޮމިޝަންގެ އެކުލެވުން ބައްޓަންކުރުން
ސަރުކާރުގެ އެންމެ އިސްވެރިޔާ އާއި ދައުލަތުގެ އެންމެ އިސްވެރިޔާގެ މަގާމަކީ ތަފާތު ދެ މަގާމަކަށް ހެދުން؛ ސަރުކާރުގެ ވެރިޔާ ރައްޔިތުންގެ އާންމު ވޯޓަކުން އިންތިހާބުކުރާ ގޮތަށް އަދި ދައުލަތުގެ ވެރިޔާ ހާއްސަ މަޖިލީހުގެ ވޯޓަކުން އިންތިހާބުކުރާ ގޮތަށް
"ބޮޑު ބަދަލު" އަކީ ދައުލަތުގެ އެންމެ މަތީ ވެރިޔެއްގެ ގޮތަށް ރައީސްއެއް ހުންނެވުމުގެ އިތުރަށް ސަރުކާރުގެ ވެރިޔަކު ވެސް ހުންނަ ގޮތަށް ވެރިކަމުގެ ނިޒާމު ބަދަލުކުރުމާއެކު ގާނޫނުއަސާސީއަށް އިސްލާހުތަކެއް ގެންނަން އިއުލާންކުރި ހަރަކާތެކެވެ.
