މީގެ ކުރިންވެސް ފުލުހުންގެ ތަރުޖަމާނެއްގެ މަގާމު އަދާކުރި ޝިޔާމް އަލުން އެ މަގާމަށް އައްޔަންކޮށްފައިވަނީ މިހާތަނަށް އެ މަގާމުގައި ހުރި ސުޕްރިންޓެންޑެންޓް އޮފް ޕޮލިސް އަހްމަދު އާރިފްގެ ބަދަލުގަ އެވެ.
ބާރަ އަހަރު ފަހުން، ފުލުހުންގެ ކުރީގެ އިސް ތަރުޖަމާނު އަދި އިންސްޕެކްޓަރު އަހުމަދު ޝިޔާމް ވަޒީފާއަށް އަލުން ނުކުންނަން ފެށީ މިއަހަރުގެ ޖޫންމަހުގެ 3 ވަނަ ދުވަހު އެވެ.
2001 ވަނަ އަހަރުގެ އޮގަސްޓް މަހުގެ 5 ވަނަ ދުވަހު ފުލުހުންގެ ވަޒީފާއާއި ގުޅުނު ޝިޔާމް އެ ވަޒީފާއިން ވަކިކޮށްފައިވަނީ 2014 ވަނަ އަހަރުގެ މޭއި މަހުގެ 26 ވަނަ ދުވަހު އެވެ. އޭނާ ވަޒީފާއިން ވަކިކޮށްފައިވަނީ ނޯތް ސެންޓްރަލް ޕޮލިސް ޑިވިޝަންގެ ކޮމާންޑަރެއްގެ ގޮތުގައި ހުރެ، މަގާމުގެ ނުފޫޒު ބޭނުންކޮށް ގަވާއިދާ ހިލާފު އަމަލުތަކެއް ކޮށްފައިވާ ކަމަށް ތުހުމަތު ކުރެވިގެން، ފުލުހުންގެ ޑިސިޕްލިނަރީ ބޯޑަށް އެ މައަސަލަ ހުށަހެޅެވުމުން ވަޒީފާއިން ސަސްޕެންޑް ކުރުމަށްފަހު ވަޒީފާއިން ވަކިކުރުމަށް ބޯޑުން ނިންމައިގެންނެވެ.
އެކަމާއި ގުޅިގެން އޭނާގެ ފަރާތުން މައްސަލަ އެންމެ ފުރަތަމަ ސިވިލް ކޯޓަށް ހުށަހެޅުމުުން އެ ކޯޓުން ނިންމީ އޭނާއަށް ވަޒީފާ ދޭން އަންގާނެ ތަނެއް ނެތް ކަމަށެވެ. އެހެން ކަމުން އޭނާ ވަނީ މައްސަލަ ހައިޓުގައި އިސްތިއުނާފުކޮށްފަ އެވެ.
މައްސަލަ އިސްތިއުނާފް ކުރުން ހުކުމް ބާތިލްކޮށް ހައި ކޯޓުން ކުރި ހުކުމުގައި ޝިޔާމަށް އަލުން ވަޒީފާ ދިނުމަށާއި ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރަ އާއި އިނާޔަތްތައް ދޭން އަމުރުކޮށްފައިވެ އެވެ. ހުކުމާއި އެއްގޮތަށް ޝިޔާމަށް ވަޒީފާދިން ނަމަވެސް، ވަޒީފާއިން ވަކިކޮށްފައި ހުރި މުއްދަތުގެ މުސާރަ އާއި އިނާޔަތް ދީފައެއް ނުވެ އެވެ. އަދި ދައުލަތުން ވަނީ ހުކުމްގެ އެ ބައި ސުޕްރީމް ކޯޓުގައި އިސްތިއުނާފުކޮށްފަ އެވެ.
