ހަވާއީގައި ބޭއްވި މި ހާއްސަ ހަފްލާގައި ޓޯބީ ވަނީ ދެމަފިރިންގެ ކައިވެނީގެ އަހުދު ފުރިހަމަކޮށްދިނުމުގައި އެންމެ އިސް ދައުރެއް އަދާކޮށްފައެވެ. މި މަންޒަރާއެކު، ދެމީހުން ވަކިވި ނަމަވެސް އެމީހުންގެ މެދުގައި އޮތް ވަރުގަދަ ގުޅުން އަނެއްކާވެސް ވަނީ މީޑިއާތަކުގެ ސަމާލުކަމަށް އައިސްފައެވެ.
ސްޕައިޑަމޭން ފިލްމުތަކުން ބޮޑު މަގުބޫލުކަމެއް ހޯދި ޓޯބީ އާއި ޖުވެލަރީ ޑިޒައިނަރު ޖެނިފާ ވަކިވީ 2016 ވަނަ އަހަރުގައެވެ. އަދި އެމީހުންގެ ކައިވެނި ރަސްމީކޮށް ނިމުމަކަށް ގެނައީ 2020 ވަނަ އަހަރު ނަމަވެސް، ދެމީހުން އަބަދުވެސް އަންނަނީ ދަރިންގެ ހައްގުގައި އަދި އަމިއްލަ ދިރިއުޅުމުގައި ވެސް އެކުވެރިކަން ދަމަހައްޓަމުންނެވެ. މި ކައިވެނީގެ ހަފްލާގައި ޓޯބީ އިސްކޮށް ހަރަކާތްތެރިވުމަކީ އެ ދެމީހުންގެ މެދުގައި އޮތް އެކުވެރިކަން ދައްކުވައިދޭ ވަރަށް ހާއްސަ މިސާލެކެވެ.
ވަރިވި ނަމަވެސް ގާތް ރަހުމަތްތެރިކަން: ކުރީގެ އަނބިމީހާގެ ކައިވެނީގެ ހަފުލާގައި ޓޯބީ މެގުއާ
ޖެނިފާ އާ ކައިވެނިކުރި ޖެއޮފް އޮގުންލެސީއަކީ މަޝްހޫރު އާޓް ކަލެކްޓާ އަދި ބިލިއަނަރު ހެކީމް އޮގުންލެސީގެ ދަރިއެކެވެ. މުނިފޫހިފިލުވުމުގެ ދާއިރާގެ ގިނަ އަދަދެއްގެ މަޝްހޫރު ފަރާތްތައް މި ކައިވެނީގެ ހަފްލާގައި ބައިވެރިވި އިރު، ޓޯބީ އާއި ޖެނިފާގެ ދެ ދަރިން ވެސް މި ހަފްލާގައި ބައިވެރިވެ އާއިލީ އުފަލުގައި ހިއްސާވިއެވެ.
މި ހަފްލާއާ ގުޅޭގޮތުން ޖެނިފާ ހާމަކުރި ގޮތުގައި، ޓޯބީއަކީ އަބަދުވެސް އޭނާގެ އެންމެ ގާތް އެކުވެރިޔާ އަދި އާއިލާގެ އެންމެ މުހިންމު އެއް ބައެވެ. އޭނާ ބުނީ ކުރީގެ ފިރިމީހާ އެމީހުންގެ ކައިވެނީގެ އަހުދު ފުރިހަމަކޮށްދިނުމަކީ ލިބުނު ވަރަށް ބޮޑު އުފަލެއް ކަމަށާއި، ދިރިއުޅުމުގެ އާ ދަތުރު ފެށުމުގައި އެންމެންގެ އެއްބާރުލުން އޮތުމަކީ ވަރަށް ބޮޑު ނަސީބެއް ކަމަށެވެ.
މި ހަބަރާއެކު ސޯޝަލް މީޑިއާގައި ގިނަ ބަޔަކު އަންނަނީ ޓޯބީ އާއި ޖެނިފާގެ މެދުގައި އޮތް ގުޅުމަށް ތައުރީފުކުރަމުންނެވެ. ވަރިވުމަށްފަހު ދެމީހުންގެ މެދުގައި މައްސަލަތައް އުފެދުމުގެ ބަދަލުގައި، އެކަކު އަނެކަކަށް އިހުތިރާމުކޮށް އަދި އުފާތަކުގައި ބައިވެރިވުމަކީ އެހެން މީހުންނަށް ވެސް ނަމޫނާއެއް ކަމަށް ގިނަ ފަރާތްތަކުން ވަނީ ފާހަގަކޮށްފައެވެ.
