އެފްއޭއެމުން ފޭސްބުކް މެދުވެރިކޮށް ކުރިއަށް ގެންދިޔަ، "ލެޓްސް ޓޯކް ފުޓްބޯލް" ފޭސްބުކް ލައިވްގައި ވާހަކަ ދައްކަމުން ސުޒެއިން ބުނީ، މިއީ އެފްއޭއެމްގެ އެގްޒެކްޓިވް ކޮމިޓީއާ ގުޅިގެން އެންމެން ކުރިއަށްދާންވީ ވަގުތު ކަމުގައި ދެކެންޖެހޭ ކަމަށެވެ.
އެފްއޭއެމްގެ މަގާމެއް ސުޒެއިނަށް ދިނުމުގެ ކުރިން އޭނާއަކީ އެފްއޭއެމަށް އެންމެ ބޮޑަށް ފާޑު ކިޔަމުން އައި އެކަކެވެ. އެ ގޮތުން ދިވެހި ފުޓްބޯޅަ އޮތީ އައިސީޔޫގައި ކަމަށާއި، ދިވެހި ފުޓްބޯޅަށް ބޭނުންވަނީ އިޚްލާސްތެރިން ކަމަށްވެސް، މިހާރުގެ އެކްސޯއަށް ނިސްބަތްކޮށް ސުޒެއިން ބުނެފައިވެއެވެ.
ރާއްޖޭގެ އެއް ނަންބަރު ކޯޗުންގެ ތެރޭގައި ހިމެނޭ ސުޒެއިން ގައުމީ ޓީމުގެ މަގާމާއި ހަވާލުވުމަށް ފަހު ބުނެފައިވަނީ އެފްއޭއެމް އާއި އެ އެސޯސިއޭޝަނުގެ ރައީސް ބައްސާމް އަދީލް ޖަލީލަށް ފާޑުކިޔުމަށް ފަހު، ގައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ މަގާމާ ހަވާލުވުމަކީ ލަދުގަންނަންޖެހޭ ވަރުގެ ކަމެއް ނޫން ކަމަށެވެ.
