މާލޭގައި ކޮވިޑްގެ ފުރަތަމަ ކޭސް ފެނުނުތާ ތިންވަރަކަށް ދުވަސް ފަހުން އަހުމަދު (އަސްލު ނަމެއް ނޫން) ހުން އައިސް ކެއްސާ ބޮލުގައި ރިއްސަން ފެށިއެވެ. އަހްމަދު ދިރިއުޅެނީ ކޮވިޑްގެ ފުރަތަމަ ކޭސް ފެނުނު މ.ޖަރީމާގޭ ގެ ކައިރީގައި ހުންނަ ގެއެއްގައި ކަމަށްވާތީއާއި ކޮވިޑް ބަލީގެ އަލާމާތްތައް ހުރުމުން އެޗްޕީއޭގެ ހޮޓްލައިނަށް ގުޅައިގެން އެންގިއެވެ. އެކަމަކު ސާމްޕަލް ނަގަން އައީ ގުޅިތާ ދެވަނަޔަށް ވީދުވަހުއެވެ. އަދި ނަތީޖާ ލިބުނީ ސާމްޕަލް ނެގިތާ ދެދުވަސް ފަހުންނެވެ. މިއީ އެންމެ ފުރަތަމަ މިބަލި ފެނުނު ވަގުތުގެ ހާލަތެވެ. މީގެ ދެދުވަސް ކުރިން މަގުމަތިން ރެންޑަމް ސާމްޕަލް ނެގުނު ފަރާތަކުން ނަތީޖާ ލިބޭނީ ކޮންއިރަކުންހޭ ސުވާލު ކުރުމުން ނަތީޖާ ލިބޭނެ ކަމަށް ބުނީ ތިންދުވަސް ފަހުން ކަމަށެވެ.
މިބަލި ކޮންޓްރޯލް ކުރުމުގެ އެންމެ މުހިއްމު މަސައްކަތަކީ ގިނަބަޔަކު އަވަހަށް ޓެސްޓް ކުރުމާއި ޕޮޒިޓިވް މީހުން ވީއެންމެ އަވަހަށް އެކަހެރި ކުރުން ކަމުގައިވާ އިރު ސާމްޕަލް ނެގުމާއި ނަތީޖާ ލަސްވުމަކީ ވަަރަށް ބޮޑު މައްސަލައެކެވެ. ޕޮޒިޓިވް މީހުން އަވަހަށް ދެނެ ނުގަނެވުމަކީ މިބަލިޖެހޭ މީހުންގެ އަދަދު ދަށަށް ނުދާ ސަބަބުކަމުގައި ތަޖުރިބާކާރުން ބުނެއެވެ.
މިއަހަރުގެ ޖަނަވަަރީން ފެށިގެން ރާއްޖެއިން މިކަމަށް ތައްޔާރުވެ ރަނގަޅަށް ޕްލޭން ކޮށް ހުރިހާ ކަމެއްކުރާނެ ގޮތުގެ ލިއުން ތައްޔާރުކޮށް ކަންކުރާނެ ގޮތުގެ އެންމެ ފަހުގެ ޖުމްލަ ލިޔެ ފުލްސްޓޮޕް ޖަހާފައި އޮތް އިރު، ޓެސްޓްކުރުން މިހާ މިގޮތަށް ވެގެން އުޅޭ ސަބަބާއި މެދު އެތައް ބަޔަކު ދަނީ ސުވާލު އުފައްދަމުންނެވެ.
މިހާރު ރާއްޖެއަކީ މިސަރަހައްދުގައި ނިސްބަތުން އެންމެ ގިނައިން މިބަލި ފެތުރިފައި އޮތް ގައުމެވެ. އަދި މުޅި ދުނިޔެއަށް ބެލިޔަސް ރައްޖޭގައި ނިސްބަތުން މިބަލި ފެތުރޭ މިންވަރު މަދެއް ނޫނެވެ. އެޗްޕީއޭގެ ފުރަތަމަ އަންދާޒާ ތަކުން ދައްކާ ގޮތުގައި މުޅިއާބާދީގެ ގިނަބަޔަކަށް މިބަލި ޖެހޭނެ ކަމުގައި ލަފާ ކޮށްފައި އޮތުމަކީ މިއަދު މިބަލި ޖެހޭ މީހުންގެ އަދަދު މަދުކުރެވިއްޖެ ކަމުގައި ބަލަން ޖެހޭ އަސާސެއް ނޫނެވެ. ހަގީގަތަކީ ނިސްބަތުން މިބަލި ރާއްޖޭގައިވަނީ ގިނަވެފައިކަމެވެ. އަދި އެއްދުވަހުން އަނެއް ދުވަހަށް ބަލި ޖެހޭ މީހުންގެ އަދަދު މަދުވާކަމަކަށް ތަފާސް ހިސާބުތަކުން ނުދައްކައެވެ.
ދުނިޔޭގައި ލޮކްޑައުން ކުރި ގިނަ ގައުމުތަކުގައި މިބަލީގެ ކާވް ނުވަތަ ބަލި ޖެހޭ މީހުންގެ އަދަދު އިތުރުވެފައި ވަކި ހިސާބަކުން ލޮކްޑައުން އާ ގުޅިގެން ބަލިޖެހޭ މީހުންގެ އަދަދު ވަރަށް ބޮޑުތަނުން ދަށަށް ގޮަސްފައިވެއެވެ. އެހެންނަމަވެސް ރާއްޖޭގައި ފުރަތަމަ ކޭސް ފެނުނު ހިސާބުން ފެށިގެންވެސް ދެތިން ދުހަކު ތަންކޮޅެއް ގިނައިން ބަލި ފެނިފައި ދެން މުޅިންވެސް ހުންނަނީ ދާދި އެއްވަރެއްގައެވެ.
ރާއްޖޭގައި ކަރަންޓީނު ނިންމުމަށްފަހު ޓެސްޓްކޮށް ނަތީޖާ ނުލިބެނީސް ފުރައިގެން ދިޔަ އިޓަލީ ބަޔަކު ކޮވިޑަށް ޕޮޒިޓިވްވީއެވެ. އެތައްބަޔަކު ނުރައްކަލަށް ހުށަހެޅިގެން ދިޔައެވެ. އޮންނަ ޕްރޮސީޖާ ނޫންކަމަށް ބުނެ ޒިންމާ ނަގާނެ ބަޔަކު ނުވިއެވެ. ކޮވިޑްްގެ ފުރަތަމަ މަރުގައި އިޙްމާލުވެއްޖެއެވެ. ޒިންމާ ކޮބައިތޯއެވެ؟ ކުރެއްދޫއިން ބަލިވި ޓޫރިސްޓް ފުރުވާލި މައްސަލައިގައި ކުރެއްދޫގެ ޑޮކްޓަރުގެ ޕާސްޕޯޓް ހިފަހައްޓައިގެން ތަހުގީގު ކުރާއިރު ނިކުން ނަތީޖާއަކީ ކޮބާ ހެއްޔެވެ؟ ޖަނަވަރީން ފެށިގެން ކޮށްފައި އޮތް ޕްލޭންތަކެއް އެބައޮތްހެއްޔެވެ؟ ޓެސްޓް ކުރުން މިހެންވީ ކީއްވެހެއްޔެވެ؟ މިއީ ޖަވާބު ބޭނުންވާ ސުވާލު ތަކެވެ.
އަބަދުވެސް މަސައްކަތް ކުރައްވާ ގޮތުގެ ފުރިހަމަކަމާއި ހިއްވަރު ގަދަކަމުގެ ވާހަކަ ދެއްކުމަކީ މުއައްސަސާތައް ހިންގަވާ ފަރާތްތަކަށް އާންމުކޮށް ދެވޭ ހަދިޔާއެކެވެ. އެހެން ނަމަވެސް މުއައްސަސާތައް ހިންގަވާ ފަރާތްތަކުގެ ތެރެއިން އެންމެންނަކީ ތައުރީފް ހައްގު ބަޔަކަށް ނުވެދާނެކަން ހަނދާން ބަހައްޓަން ޖެހެއެވެ. ތައުރީފު ހައްގު ފަރާތްތަކަށް ތައުރީފު ކުރަން ޖެހޭނީ ކަންކަމުގައި އިހުމާލުވާ ފަރާތްތައް ޒިންމާ ކުރުވޭނެ އުސޫލުތަކާއި ޒިންމާ ކުރުވޭ ސަގާފަތެއް އެތަނެއްގައި ހިނގައިގެންނެވެ.