ފާއިތުވި 24 ގަޑިއިރުގެ ތެރޭގައި ބްރެޒިލުން 1،124 މީހުން ކޮވިޑް-19 ވައިރަހުގެ ސަބަބުން މަރުވެފައިވާއިރު، މި އަދަދާއި އެކު، އެ ގައުމުން މަރުވި މީހުންގެ އަދަދު ވަނީ ސްޕެއިން އިން މަރުވި މީހުންގެ އަދަދަށް ވުރެ އިތުރުވެފަ އެވެ. އެގޮތުން، ބްރެޒިލް މިހާރު އޮތީ ވައިރަހުން އެންމެ ގިނަ މީހުން މަރުވި ފަސް ވަނަ ގައުމުގެ ގޮތުގަ އެވެ.
މިހާރު ވައިރަސް އެންމެ ބޮޑަށް ފެތުރެމުންދާ ބްރެޒިލްގައި ދުވާލެއްގެ މައްޗައް 1000 މީހުން މަރުވާއިރު، ކޮންމެ ދުވަހަކު ވެސް 20،000 އާ ގާތް ކުރާ އަދަދަކަށް ދަނީ މީހުން ކޮވިޑަށް ޕޮޒިޓިވް ވަމުން ނެވެ.
ކޮރޯނާ ވައިރަސް ކޮންޓްރޯލް ކުރެވޭނެ ދުވަހެއް ވެސް ނޭނގޭއިރު، އެ ގައުމުގެ ބައެއް ރައްޔިތުން ދަނީ، ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން އެ ގައުމުން އަޅާފައިވާ ފިޔަވަޅުތަކާ ދެކޮޅު ހަދާ މުޒާހަރާ ކުރަމުން ނެވެ. އަދި ރައްޔިތުން ކުރަމުންދާ މުޒާހަރާގައި އެ ގައުމުގެ ރައީސް ޖައިރް ބޮލްސޮނޯރާ ވެސް ބައިވެރިވެވަޑައިގެން އުޅުއްވި މަންޒަރު ފެނިފައިވާކަމަށް މީޑިއާތަކުން ބުނެއެވެ.
ޔުނިވާސިޓީ އޮފް ވޮޝިންޓަން އިން ވަރަށް ފަހުން ހެދި ދިރާސާ އަކުން ދައްކާ ގޮތުގައި، އޮގަސްޓް މަސް އަންނަންވާއިރު ބްރެޒިލް އިން މަރުވާ މީހުންގެ އަދަދު 125،000 އަށް އަރާފާނެ އެވެ. އަދި، ބްރެޒިލްގައި ކޮރޯނާ ވައިރަސް ފެތުރޭ މިންވަރާއި ވައިރަހުގެ ސަބަބުން މަރުވާ މީހުންގެ އަދަދު މަދު ކުރަން ބޭނުންވާ ނަމަ، ދުނިޔޭގެ އެހެން ގައުމު ތަކުގައި އަމަލު ކުރި ގޮތަށް އެ ގައުމުން ވެސް އަމަލު ކުރަން ޖެހޭ ކަމަށް އެ ދިރާސާކުރި ޑޮކްޓަރު ކްރިސްޓޮފާ މުރޭ ވިދާޅުވެ އެވެ.
ބްރެޒިލްގައި ވައިރަހަށް ޕޮޒިޓިވްވެފައިވާ މީހުންގެ އަދަދު 465,166 އަރާފައިވާއިރު، އެ ގައުމު މިހާރު އޮތީ ދުނިޔެއިން އެންމެ ގިނަ މީހުން ވައިރަހަށް ޕޮޒިޓިވްވެފައިވާ ދެ ވަނަ ގައުމުގެ ގޮތުގަ އެވެ.
