މިކަމާ ގުޅިގެން "ސީއެންއެމް" އަށް މައުލޫމާތު ދެމުން އޭސީސީގެ މީޑިޔާ އޮފިޝަލް ހަސަން މަނިކް ވިދާޅުވީ ގަވާއިދާއި ހިލާފަށް ޖީހާންއަށް ގޯތި ދިން މައްސައަކީ މީޑިޔާގައި އާންމުވެފައިވާ މައްސަލައެއް ކަމަށާއި މި މައްސަލަ ބަލަން ނިންމާފައިވަނީ ކޮމިޝަންގެ އިސްނެގުމުގެ މަތިން ކަމަށެވެ.
އޭނާ ވިދާޅުވީ މިއީ އެއްވެސް ފަރާތަކުން އެކޮމިޝަނަށް ހުށައެޅި މައްސަލައެއް ނޫންކަމަށާއި މި މައްސަލައަކީ މީޑިޔާތަކުގައި މި ވާހަކަތައް އާންމުވުމާއި ގުޅިގެން އޭސީސީން ބަލަން ފަށައިފައިވާ މައްސަލައެއް ކަމަށެވެ.
މި މައްސަލަ ތަހުގީގު ކުރުމަށް ނިންމުމުގެ ކުރިން އިވެލުއޭޝަންގެ މަސައްކަތުގެ ތެރެއިން މައްސަލައަކީ ކޮމިޝަންގެ މެންޑޭޓަށް ފެތޭ މައްސަލައެއްތޯ ބަލާ ވަޒަންކުރުމުގެ ކަންކަން ކުރިޔަށް ދާކަމުގައި އޭނާ އިތުރަށް ވިދާޅުވެފައިވެއެވެ.
ޖީހާންގެ ފިރިކަލުންގެ ރަށް ކަމަށްވާ ގަމުން 400 ގޯތި ލިބޭ މީހުންގެ ވަގުތީ ލިސްޓްގައި 71 ޕޮއިންޓްއާއި އެކު އޭނާގެ ނަން އާންމުކޮށްފައިވެއެެވެ. އެރަށުގައި ދިރިއުޅޭ މީހުންނަށް ހާއްސަކުރި 10 ޕޮއިންޓް ވެސް ޖީހާންއަށް ލިބިފައި ވާއިރު ދެމަފިރިން ދިރިއުޅެމުން އަންނަނީ މާލޭގައެވެ. މި މައްސަލަ ފެންމަތިވި ފަހުން ޖީހާން ވަނީ ގަމުން ލިބުނު ގޯތި ދޫކޮށްލާފައެވެ.
