އަންޑަ ޓޭކަގެ ރެސްލިންގެ ހަޔާތް ނިންމާލާކަން އިއުލާންކުރީ، ޑަބްލިޔު ޑަބްލިޔު އީގެ "ދަ ލާސްޓް ރައިޑް" ކިޔާ ޑޮކިއުމެންޓަރީއަކަށް ދިން އިންޓަރވިޔުއެއްގައެވެ.
އަންޑަ ޓޭކަ ނުވަތަ އަސްލު ނަމުން ނަމަ، މާކް ކަލާވޭއަކީ ވޭތިވެދިޔަ 30 ހަކަށް އަހަރު ތެރޭގައިވެސް ރެސްލިންގެ ރިންގުގެ ތެރޭގައި އެންމެ ބޮޑު މަގްބޫލުކަމެއް ހޯދާފައިވާ އެއް ރެސްލަރެވެ. ނުވަދިހައިގެ ކުރީކޮޅުން ފެށިގެން ދެހާހުގެ ފަހުގެ އަހަރުތަކާއި ހަމައަށްވެސް އަންޑަ ޓޭކަ އަކީ ދިވެހިންގެ މެދުގައިވެސް މަގުބޫލު ރެސްލަރެކެވެ.
އަންޑަ ޓޭކަ، އޭނާގެ ކާމިޔާބު ރެސްލިންގ ހަޔާތަށް ފަހު، ރެސްލިންގްގެ ރިންގު ދޫކޮށްލާކަން ހާމަކުރަމުން ބުނެފައިވަނީ އެ ކުޅިވަރުގައި އޭނާ އިތުރަށް ދެން ހާސިލުކުރަން ޖެހޭ ކަމެއް ނެތް ކަމަށެވެ. އެހެން ނަމަވެސް އޭނާގެ ރިޓަޔަމަންޓް އަދި ރަސްމީކޮށް އިއުލާނެއް ނުކުރެއެވެ.
އުމުރުން 52 އަހަރުގެ އަންޑަ ޓޭކަ، ޑަބްލިޔު ޑަބްލިޔު އީ ވޯލްޑް ހެވީވެޓް ޗެމްޕިއަންކަން އެތައް ފަހަރަކު ހޯދާފައެވެ. އޭނާވަނީ އޭނާގެ ކާމިޔާބު ރެސްލިންގ ކެރިއަރުގެ ވާހަކަތައް "ދަ ލާސްޓް ރައިޑް" ޑޮކިއުމެންޓްރީއަށް ކިޔައިދީފައެވެ.
އަންޑަ ޓޭކާގެ އިތުރުން ދިވެހިންގެ މެދުގައި މަގުބޫލުކަން ހޯދާފައިވާ ރެސްލިންގ ތެޅުންތެރިންގެ ތެރޭގައި ޖޯން ސީނާ، އަދި ދަ ރޮކް، ޓްރިޕަލް އެޗް އަދި ކޭން ހިމެނެއެވެ.
