އާއްމު ގޮތެއްގައި ހޫނު މޫސުމުގައި ވޯލްޑްކަޕް ބާއްވަމުން އައި ނަމަވެސް 2022 ވަނަ އަހަރުގެ ވޯލްޑް ކަޕް އޮންނާނީ ފިނި މޫސުމުގައެވެ. މުބާރާތް ހުޅުވާ މެޗުގައި ނޮވެމްބަރު މަހުގެ 21 ވަނަ ދުވަހު އެއް ކޮޅުން ވާދަކުރާނީ މުބާރާތް ހޯސްޓް ކުރާ ގަތަރެވެ. ގަތަރު ވޯލްޑްކަޕް ފިނި މޫސުމުގައި ބާއްވަން ދުނިޔޭގެ ފުޓްބޯޅައިގެ މައި އިދާރާ ފީފާއިން ނިންމީ، އާއްމުކޮށް މުބާރާތް ބާއްވަމުން އަންނަ ޖޫން، ޖުލައި އަކީ ގަތަރުގެ ހޫނު މޫސުން ކަމަށްވުމުން، ޓީމުތަކަށް ދިމާވެދާނެ ދަތިތަކަށް ބެލުމަށްފަހުގައެވެ. ބުދަ ދުވަހު ފީފާއިން އާއްމުކުރި، ގަތަރު ވޯލްޑްކަޕްގެ ޝެޑިއުލްގައިވާ ގޮތުން، މުބާރާތުގެ ގްރޫޕް ސްޓޭޖުގެ މަރުހަލާގައި ދުވާލަކު ހަތަރު މެޗު ކުޅޭނެއެވެ.
ގަތަރުން ކަނޑައަޅާފައިވާ ގޮތުން، މުބާރާތުގެ ފުރަތަމަ މެޗު ކުޅޭނީ ވެރިރަށް ދޯހާގެ އަލް ބައިތު ސްޓޭޑިއަމްގައެވެ. މި ސްޓޭޑިއަމްއަކީ 60،000 މީހުންގެ ޖާގައިގެ ސްޓޭޑިއަމްއެކެވެ. މުބާރާތުގެ ފައިނަލް މެޗު ކުޅޭނީ 80،000 މީހުންގެ ޖާގައިގެ ލުސައިލް ސްޓޭޑިއަމްގައެވެ.
2022 ވަނަ އަހަރު ގަތަރުގައި ބާއްވާ ވޯލްޑްކަޕަކީ ތާރީހީ މުބާރާތަކަށް ހެދުމަށް ގަތަރުން އަންނަނީ މަސައްކަތް ކުރަމުންނެވެ. ފީފާގެ ރައީސް ޖިއާނީ އިންފަންޓީނޯ ވަނީ ގަތަރު ވޯލްޑްކަޕަކީ ހުރިހާ ގޮތަކުންވެސް ތާރީހީ ވޯލްޑް ކަޕަކަށް ވެގެންދާނެ ކަމަށް ވިދާޅުވެފައެވެ.
