ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ރާއީ ވިދާޅުވީ، މީގެ ދުވަސްކޮޅެއްކުރިން މިނިސްޓާ އިމްރާން އާއި ގުޅޭ އޯޑިއޯއެއް އާންމުވިކަމަށެވެ. އަދި އޭގެ ފަހުން ސިހުރު ހާހޫރާހަދާފައިވާކަމަށް ބުނެ ފުލުހުން ލައްވާ ގަބުސްތާނު ކޮނުނު ވާހަކަ ވެސް އާންމުވެފައިވާކަމަށެވެ. ނަމަވެސް އެއިން އެއްވެސް ކަމެއްގެ ހަގީގަތް މިހާތަނަށް ރައްޔިތުންނަށް ހާމަނުވާކަމަށެވެ.
ރާއީ ވިދާޅުވީ ހޯމް މިނިސްޓަރަކީ ފުލުހުންގެ މުއައްސަސާއާއި ހަވާލުވެ ހުންނަ ބޭފުޅަކަށް ވާއިރު، އެ ބޭފުޅާއާއި މެދު ޝައްކު އުފެދޭ ކަންތައްތަކެއް ހިނގާނަމަ އެކަން ސަރުކާރުގެ ފަރާތުން ނުވަތަ، ކޯލިޝަނުގެ ފަރާތުން ނުވަތަ ކެބިނެޓުގެ ފަރާތުން ނަމަވެސް ސާފުކޮށްދޭން ޖެހޭކަމަށެވެ.
އިމްރާންއަށް ފާޑުވިދާޅުވަމުން ރާއީ ވިދާޅުވީ "މަކަރާ ހީލަތާ އޮޅުވާލުމާ" އެކު ވަޒީރުކަމުގައި ހުރެގެން ނުވާނެކަމަށެވެ. އަދި ދިވެހި ފުލުހުން އެ ކަންތައްތައް ސާފުކޮށްދޭން ޖެހޭކަމަށެވެ. އަދި ކެބިނެޓުގެ ފަރާތުން ވެސް އެކަންތައްތައް ސާފުކޮށްދީ "ބަލިވެ އުޅޭނަމަ ފަރުވާ ލިބެން ޖެހޭނެ،" ކަމަށް ވެސް ރާއީ ވިދާޅުވިއެވެ.
ސޯސަލް މީޑިއާގައި މީގެ ދުވަސްކޮޅެއް ކުރިން އަންހެނަކު ވަނީ އޭނާއަށް ދީން އުގަންނައިދިނުމުގެ ނަމުގައި ޖިންސީ ފުރައްސާ ނުވަތަ ގޯނާ ކުރާ އުސޫލުން މިނިސްޓަރު އިމްރާން އަމަލުކުރައްވާފައިވާކަމަށް ދޭހަވާގޮތައް ތުހުމަތުކޮށް ވާހަކަ ދައްކައި އޯޑިއޯއެއް އާންމުކޮށްފައެވެ. އޭގެ ދުވަސްކޮޅެއް ފަހުން ސޯޝަލް މީޑިއާގައި ޝޭހް އިމްރާން އަށް ރުގުޔާ ކުރާކަމަށް ބުނާ ވީޑިއޯއެއް ވެސް ވަނީ އާންމުވެފައެވެ. އެ ވީޑިއޯއާއިއެކު މީޑިއާތަކުގައި ރިޕޯތުކޮށްފައިވާގޮތުން މިނިސްޓާ އިމްރާން އަށް ސިހުރު ހަދާފައިވާކަމަށް ބުނެ ފުލުހުން ވަނީ ގަބުރުސްތާނެއް ވެސް ކޮނެފައެވެ.
ރާއީގެ ވާހަކަތަކާ ގުޅިގެން މަޖިލީހުގެ ރައީސް މުހައްމަދު ނަޝީދު ވިދާޅުވެފައިވަނީ ވަޒީރުން ޖަވާބުދާރީ ކުރުމަށް ސުވާލުކުރުމުގެ ފުުރުސަތު މެމްބަރުންނަށް އޮންނަކަމަށެވެ.
