ހޮނިހިރު ދުވަހު ހެނދުނު އަލީ ހުސެން މިހެން ވިދާޅުވިއިރު، އޭނާއަކީ މާލެއަށް މީހުން ޖަމާކުރުމާ ދެކޮޅަށް ފާޅުގައި އަޑު އުފުލަމުން ގެންދާ މެންބަރެކެވެ.
މީހުން މާލެ އަންނަން މައިގަނޑު ސަބަބުތަކެއް ކަމުގައި ބެލެވެނީ އެކަށީގެންވާ އަސާސީ ހިދުމަތްތަކާއި، ވަޒީފާ ހޯދުމެވެ.
މިގޮތުން ކުރީގެ ރައީސް އަބްދުﷲ ޔާމިންގެ ސަރުކާރުން ހިނގި ބޯހިޔާވަހިކަމުގެ މަޝްރޫއާއި ގުޅޭގޮތުން ވާހަކަ ދައްކަވަމުން އަލީ ހުސެން ވިދާޅުވެފައިވަނީ ތޮއްޖެހިފައިވާ އަދި ވިހަ ވަޔާއި ކުށުގެ ވެށީން އިޖުތިމާއީ ހާލަތު ތަގައްޔަރުވެފައިވާ މާލެ އައުމުގެ ބަދަލުގައި ރީތި ނަލަނަލަ ރަށްތަކުގައި އުފާވެރި ދިރިއުޅުމެއް ހޯދުން މާ ރަނގަޅުވާނެ ކަމަށެވެ.
އޭނާ ވިދާޅުވެފައިވަނީ ލިބޭ އާމްދަނީގެ 85 ޕަސެންޓް ކުލީގެ ގޮތުގައި ފްލެޓަށް ދައްކަން މާލެ އަންނަށް ގިނަ ރައްޔިތުން ބޭނުން ނުވާކަމަށެވެ.
އަލީ ހުސެން ވިދާޅުވެފައިވާގޮތުގައި މާލެ ތޮއްޖެއްސުމުގެ ސިޔާސަތަކީ "މީގެ ބައި ގަރުނަކުރިން ފެއްޓިފައިވާ އަދި މިހާރު ބޮޑުތަނުން ފެއިލްވެފައިވާ ދެކޮޅު ނުޖެހޭ ސިޔާސަތެއް" ކަމަށެވެ.
މާލޭގެ ރައްޔިތުންނާ އެއްވެސް ދެކޮޅުވެރި ކަމެއް ނެތް ކަމަށާއި ނަމަވެސް ރާއްޖޭގެ އާބާދީގެ 75 ޕަސެންޓް މީހުން މާލެއަށް ޖަމާކުރުމަކީ ސިޔާސަތަކީ ގަބޫލުކުރެވޭނެ ސިޔާސަތެއް ނޫން ކަމަށް އަލީ ހުސެއިން ވަނީ ވިދާޅުވެފައެވެ.
ރައީސް ޔާމިންގެ ސަރުކާރުން ހުޅުމާލޭ ދެވަނަ ފޭސްގައި އެޅި 7000 އެޕާޓުމަންޓުގެ މަސައްކަތް ނުނިމި އެތަންތަން ހައްގުވެރިންނާއި މިހާތަނަށް ހަވާލުކުރެވިފައެއް ނުވެއެވެ. އަދި އެތަންތަނުގެ ސައިޒާއި އަގާއި މެދު ސަރުކާރާއި، އިދިކޮޅާއި ދެމެދު ވަނީ ބޮޑެތި ހިޔާލުތަފާތުވުންތަކެއް އުފެދިފައެވެ.
މި ސަރުކާރުން ހިންގާ ބޯހިޔާވަހިކަމުގެ މަޝްރޫގެ ދަށުން މެދުފަންތީގެ މީހުންނަށް އަމާޒުކޮށް ހުޅުމާލޭގައި އެޕާޓްމަންޓް ބިލްޑިންތަކެއް ހެދުމަށް ފަހު އެތަންތަނަށް ވިއްކާނެ ބަޔަކު ހޯދަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ އިއުލާންކޮށްފައެވެ.
އެޗްޑީސީން އިއްޔެ ކުރި އިއުލާނެއްގައި ބުނީ، "މިކްސްޑް ރެޒިޑެންޝަލް ބިލްޑިންގް" ގެ ގޮތުގައި ހަތަރު އެޕާޓްމަންޓް ބިލްޑިންއެއް އިމާރާތްކޮށް ވިއްކާނެ ބަޔަކު ހޯދަމުން އަންނަ ކަމަށެވެ.
އެކަމަށް ޝައުގުވެރިވާ ފަރާތްތަކުން އަންނަ ސެޕްޓެމްބަރު މަހުގެ 24 ވަނަ ދުވަހުގެ ކުރިން ޕްރޮޕޯސަލް ހުށަހަޅަން ޖެހެ އެވެ.
ހުޅުމާލޭގައި އަލަށް އަޅަން ނިންމާފައި ވަނީ 14 ބުރީގެ ތިން އިމާރާތާއި 10 ބުރީގެ އިމާރާތެކެވެ.
އެގޮތުން ޕްލެޓިނަމް ބިލްޑިންގް އާއި ރެނާޓަސް ފްލެޓުތައް ކައިރީ އިމާރާތް ކުރަން ނިންމާފައިވާ އެ އެޕާޓްމަންޓް ބިލްޑިންގްތަކުގެ ތެރެއިން 10 ބުރީގެ އިމާރާތުގެ ބޮޑު މިނުގައި 12،294.10 އަކަފޫޓު ހުންނާނެ އެވެ. އަދި 14 ބުރީގެ ތިން އިމާރާތުގެ ބޮޑު މިނުގައި 24،098.22 އަކަފޫޓާއި 30،047.97 އަކަފޫޓު އަދި 26،969.06 ހުންނާނެ އެވެ.
އިއުލާނުގައި ބުނީ އެކަމަށް ޝަކުގުވެރިވާ ދިވެހި ޕާޓީތަކުން ބިޑް ސެކިއުރިޓީގެ ގޮތުގައި ފަސް ލައްކަ ރުފިޔާ ހުށަހަޅަން ޖެހޭނެ ކަމަށެވެ. އަދި ބޭރުގެ ޕާޓީއެއްނަމަ ބިޑް ސެކިއުރިޓީގެ ގޮތުގައި އެއް ލައްކަ ޑޮލަރު ހުށަހަޅަން ޖެހެ އެވެ.
އިއުލާނުގައި އިތުރަށް ބުނީ މި ދުވަސްވަރަކީ ކޮވިޑް-19 ގެ ހާލަތު ކަމުން، ހުށަހަޅާ ޕްރޮޕޯސަލުތަކުގެ މައުލޫމާތު ދޭނީ ރަޖިސްޓްރީކޮށްފައިވާ ފަރާތްތަަށް އެކަނި ކަމަށެވެ. އަދި އަންނަ މަހުގެ 13 ވަނަ ދުވަހުގެ ކުރިން ރަޖިސްޓްރީ ވާންޖެހޭނެކަން ވެސް އިއުލާނުގައި ފާހަގަކުރެ އެވެ.
އެކަމަށް ޝައުުވެރިވާ ފަރާތްތަކުން އޮގަސްޓް މަހުގެ 27 ގެ ކުރިން [email protected] މެދުވެރިކޮށް މައުލޫމާތު ސާފުކުރަން ޖެހެ އެވެ.
މީގެ ކުރިން ވެސް ހުޅުމާލޭގައި އެޕާޓްމަންޓް ބިލްޑިންތަކެއް ހަދައި ވިއްކާފައިވެ އެވެ.
