މިހާރު ސަރުކާރުން ވަނީ ގެސްޓް ހައުސްތައް ހުޅުވުން އަންނަ ސެޕްޓެމްބަރު މަހަށް ފަސްކޮށްފަ އެވެ. އެކަމުގެ ކަންބޮޑުވުން މިއަދު ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް) އިން ފާޅުކޮށްފައިވަނިކޮށް އާދިލް ކުރެއްވި ޓްވީޓެއްގައި ވަނީ ޖުމްހޫރީ ޕާޓީން ޓޫރިޒަމް މިނިސްޓްރީ އާއި ހެލްތު މިނިސްޓްރީ ނަގައިގެން ތިބި ރިސޯޓުތައް ހުޅުވުމަށް ފަހު ގެސްޓްހައުސްތަކަށް ފުރުސަތު ނުދީ ދިގު ދަންމަނީ ރަށްރަށުގެ މީހުން މަޑުން ތިބޭނެ ކަމަށްތޯ ސުވާލު އުފައްދަވާފަ އެވެ.
އަދި އާދިލް ވިދާޅުވީ ރަށްރަށުގެ އިގްތިސޯދު ބަދަލުކުރީ އެމްޑީޕީގެ ޕޮލިސީން ކަމަށާއި ރައްޔިތުންނަށް "ދޯކާ" ދީގެން ނުވާނެ ކަމަށެވެ.
އޭގެ އިތުރުން ވިދާޅުވީ ކ. އަތޮޅުގައި ފުޅާ ދާއިރާއެއްގައި ގެސްޓްހައުސްގެ ވިޔަފާރިކުރަމުން އަންނަ މާފުށީގެ ގެސްޓްހައުސްތަކުން އަންނަ މަހު އެކަނި ވެސް 40 އިންސައްތަ ބުކްކޮށްފައިވާ ކަމަށެވެ. އަދި ރިސޯޓުތައް ހުޅުވައިގެން މިހާތަނަށް އައީ 1000 މީހުން ކަމަށާއި އެކަމަކު ގެސްޓްހައުސްތައް ހުޅުވުމުން އެ އަދަދު މާބޮޑަށް ވެސް ރަނގަޅުވާނެ ކަމަށް އާދިލް ވިދާޅުވި އެވެ.
އެކަމަކު ވަރަށް ކުއްލި ގޮތަކަށް ސަރުކާރުގެ ވިސްނުން ބަދަލުކޮށް އޮގަސްޓް މަހު ނުހުޅުވާނެ ކަމަށް ބުނުމަކީ މުޅި ސިނާއަތަށް ލިބުނު ވަރަށް ބޮޑު ގެއްލުމެއް ކަމަށް އެ އެސޯސިއޭޝަނުން ބުނެ އެވެ.
