Advertisement

ބަންގްލަދޭޝްގައި ކިޔަވަން އުޅެނިކޮށް މަރުވި ރައުދާ އާތިފް ދަން ޖެހިފައި ހުއްޓާ ފެނުނު މީހަކު އަދި ފޮޓޯއެއް ވެސް ނުދެއްކުނު ކަމަށް އޭނާގެ ބައްޕަ މުހައްމަދު އާތިފް ބުނެފި އެވެ.

އާތިފްގެ ފޭސްބުކް ޕޭޖުގައި ލިޔެފައިވާ ޕޯސްޓެއްގައި ބުނެފައި ވަނީ އޭނާގެ މާމައަށް ވެސް ރޯނު ޖޯއްޔެއްގައި ގިނައިރު އޮތުމުން ބުރަކައްޓަށް އަރާނީ ރޯނުގެ ގެތުންކަން އެނގޭނެ ކަމަށާއި ނަމަވެސް ރައުދާގެ ކަރުގައި ހުރީ ސްކާފެއްގެ ނިޝާން ނޫންކަން މަރު ކޮމިޝަނުގައި ތިބި މީހުނަށް ނޭނގެނީތޯ ސުވާލުކޮށްފަ އެވެ.

އަދި ރައުދާގެ ކަރުގައި ހިފާ މަރާލުމުން ކަރުގައި ހިފި މީހާގެ ތިން އިނގިއްޔާ ބޮޑުވާ އިނގިލީގެ ނިޝާން ހުރި ކަމަށް ބުނެ އާތިފް ލިޔެފައި ވަނީ ރާޖް ޝާހީ ޕޮލިސް އިންކުއެސްޓް ރިޕޯޓްގައި އެކަން އެގޮތަށް ބަޔާންކޮށްފައިވާ ކަމަށެވެ.

އަދި ރައުދާގެ މޫނުގައި އަނިޔާގެ ނިޝާން ހުރި ކަމަށާއި ޕޯސްޓް މޯޓަމް އޮޓޮޕްސީ ފޮޓޯތަކުން ވެސް އެކަން ސާބިތުކޮށްދޭ ކަމަށް އާތިފް ބުނެ އެވެ. ރައުދާއަށް ފޮނުވި ކަމަށް ސީއައީޑީ ފުލުހުން ބުނި ޓްވިޓާ މެސެޖާއި އެކައުންޓް ހޯދުނު ކަމަށް މަރު ކޮމިޝަންގެ ރައީސް ހުސްނުއް ސުއޫދު ވިދާޅުވި ކަމަށް ވެސް އެ ޕޯސްޓުގައި ވެއެވެ.

މި ހުރިހާ ހެކި ހުރި އިރުވެސް މަރު ކޮމިޝަނުން ބުހުތާން ދޮގު ހަދާ ރައުދާގެ މަރުގެ ހަގީގަތް އޮޅުވާލާ އާއިލާއަށް އިތުރު ހިތްދަތިކަމެއްދީ ރައްޔިތުންނަށް އޮޅުވާލީ ކަމަށް ވެސް އާތިފް ބުނެ އެވެ.

ރައުދާ މަރުވީ އަމިއްލައަށް ކަމަށް މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ބުނި ނަމަވެސް އެކަން ގަބޫލު ނުކުރާ ކަމަށް ރައުދާގެ ބައްޕަ މީގެ ކުރިން ވެސް ވަނީ ބުނެފަ އެވެ. އެގޮތުން މީގެ ކުރިން އާތިފްގެ ފޭސްބުކްގައި ކުރި ޕޯސްޓެއްގައި ބުނީ ކޮމިޝަނުން ނެރުނު ރިޕޯޓު ގަބޫލު ނުކުރާ ކަމަށާއި ރިޔާސީ ކޮމިޝަނުން ވެސް އަދި ރައީސް އޮފީހުން ވެސް އޭނާއަށް އެ ރިޕޯޓުގައި ފާހަގަކުރެވުނު ކަންކަން ހިއްސާ ނުކުރާ ކަމަށެވެ.

އާތިފު ވަނީ ރައުދާގެ މަރުގެ ހެކިތައް ނައްތާލުމަށް މިހާރުގެ އެސިސްޓަންޓް ކޮމިޝަނަރު އޮފް ޕޮލިސް މުހައްމަދު ރިޔާޒު މަސައްކަތް ކޮށްފައިވާ ކަމަށް ވެސް ތުހުމަތުކޮށްފަ އެވެ. އަދި އެ ޖަރިމާ ތަހުގީގު ކޮށްދިނުމަށް އެދި ރައީސް އިބްރާހީމް މުހައްމަދު ސޯލިހު އާއި ހޯމް މިނިސްޓަރު އިމްރާން އަބްދުﷲ އަށް ދެންނެވި ކަމަށް ވެސް އާތިފް ކުރިން ކުރި ޕޯސްޓެއްގައި ވަނީ ބުނެފަ އެވެ.