ރިޔާޒް ކުރެއްވި ޓުވީޓެއްގައި ވިދާޅުވީ، ޑިއުޓީގައި ހުރި ފުލުހެއްގެ ގަޔަށް ކުޅު ޖެހި ޖެހުން ކުށްވެރިކުރާކަަމަށެވެ. އަދި ޑިއުޓީގައި ހުންނަ ފުލުހުންނަށްދޭ ހަމަލަތަކަކީ މާފުނުދެވޭ ކުށްތަކުގެ ތެރެއިން ކުށެއްގެ ގޮތުގައި ފުލުހުންގެ ޤާނޫނުގައި ހިމަނަންޖެހޭ ކަމަށް ވިދާޅުވި އެވެ.
ރިޔާޒް މިގޮތަށް ޓުވީޓް ކުރައްވާފައި މިވަނީ ޕީޕީއެމް އާއި ޕީއެންސީން މާލޭގައި ރޭ ކުރި މުޒާހަރާ ހުއްޓުވަން މަސައްކަތް ކުރި ދެ ފުލުހެއްގެ ގަޔަށް މުޒާހަރާގެ ބައިވެރިއަކު ކުޅު ޖަހާފައިވާ ފޮޓޯއެއް ޕޮލިސް ކޮމިޝަނަރު މުހައްމަދު ހަމީދު ރޭ ޓުވީޓް ކުރެއްވުމާއި ގުޅިގެންނެވެ. ސީޕީ ހަމީދު ކުރެއްވި ޓްވީޓެއްގައި ވިދާޅުވީ، ދެ ފުލުހެއްގެ ގަޔަށް ކުޅު ޖެހުމަކީ ނާތަހުޒީބު އަމަލެއް ކަމަށެވެ. އަދިވެސް މި ތިބީ ކޮވިޑް-19ގެ ނުރައްކަލުގެ ތެރޭގައި ކަމަށާއި މިފަދަ އަމަލުތައް ބަލައި ނުގަނެވޭނެ ކަމަށާއި އެ ކަންތައް ތަހުގީގު ކުރާނެ ކަމަށް ވިދާޅުވި އެވެ.
އިދިކޮޅުން ރޭ ކުރިއަށް ގެންދިޔަ މުޒާހަރާގެ ތެރެއިން ފުލުހުންގެ ގަޔަށް ކުޅު ޖެހި މައްސަލައިގައި ގިނަ ފަރާތްތަކަކުން އަންނަނީ ޕީޕީއެމަށް ފާޑުކިޔަމުންނެވެ. އަދި ޕީޕީއެމުން ވަނީ އެފަދަ ކަމެއް ކުރިކަމަށް އިންކާރުކޮށްފަ އެވެ.
