އަންގާރަ ދުވަހުގެ ރޭ އިދިކޮޅު ޕީޕީއެމް/ޕީއެންސީން ބޭއްވި މުޒާހަރާގައި ފުލުހުންގެ ގަޔަށް ހައްޕުނޑު ޖެހުމުން "ޕީޕީއެމްގެ މެމްބަރުން އެޒާތުގެ އަމަލެއް ނުހިންގަވާނެކަމުގެ ފުރިހަމަ ޔަގީންކަން" އެބައޮތްކަމަށް" ވިދާޅުވެ ރައީސް ޔާމިންގެ ރަނިންމޭޓު ޝޭހު މުހައްމަދު ޝަހީމް ޕީޕީއެމް ދިފާއުކުރައްވައި ޕީއެންސީ ތުހުމަތު ވާގޮތައް ވާހަކަ ދައްކަވައިފިއެވެ.
Advertisement
ޝަހީމް މިގޮތައް ވާހަކަ ދެއްކެވިއިރު، ރޭ ބޭއްވި މުޒާހަރާއަކީ ޕީޕީއެމާއި، ޕީއެންސީ ގުޅިގެން ބޭއްވި މުޒާހަރާއެކެވެ.
ޕީޕީއެމް މެމްބަރެއް އެފަދަކަމެއް ނުކުރާނެކަމަށް ވިދާޅުވި ނަމަވެސް، ޕީއެންސީ މެމްބަރެެއް އެފަދަކަމެއް ނުކުރާނެކަމަށް ޝަހީމް ވިދާޅެއް ނުވެއެވެ.
"ފުލުހުންގެ ގަޔަށް ހައްޕުޑު ޖެހުން ކުށްވެރިކުރަން. ޕީޕީއެމްގެ މެމްބަރުން އެޒާތުގެ ޢަމަލެއް ނުހިންގަވާނެކަމުގެ ފުރިހަމަ ޔަޤީންކަން އަޅުގަނޑަށް އެބައޮތް. ޕިޕީއެމަކީ ފުލުހުންނަށް އިހުތިރާމްކުރާ ތަހުޒީބު ޕާޓީއެއް. އެދެނީ އެކަން ކުރި ފަރާތެއް ހޯދައި ތަޙުޤީޤުކޮށް ޤާނޫނީ ފިޔަވަޅު އެޅުން،" ޝަހީމް މިއަދު ހެނދުނު ވިދާޅުވިއެވެ.
މުޒާހަރާގެ ތެރެއިން ފުލުހުންގެ ގަޔަށް ކުޅު (ހައްޕުނޑު) ޖެހި މައްސަލަ ބަލާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ.
ސީޕީ ހަމީދު ވިދާޅުވީ މުޒާހަރާގެ ބައިވެރިން ފުލުހުންގެ ފްރަންޓްލައިންގައި މަސައްކަތްކުރި ފުލުހުންގެ ގަޔަށް ކުޅު ޖެހިޖެހުމަކީ ބަލައިގަނެވޭނެ ކަމެއްނޫންކަމަށެވެ.
"މި ނާތަހުޒީބު އަމަލު ކުށްވެރި ކުރާ ހާލު، މިކަންކުރި ފަރާތް ހޯދައި ގާނޫނީގޮތުން އެޅެން އޮތް އެންމެ ހަރުކަށި ފިޔަވަޅު އެޅުމަށް ކުރަންޖެހޭ މަސައްކަތް މި ސަރވިސް އިން ކުރަމުންދާ ވާހަކަ ދަންނަވަން." - ސީޕީ ހަމީދު -
އިދިކޮޅުން އަންގާރަ ދުވަހުގެ ރޭ ކުރިއަށްގެންދިޔަ މުޒާހަރާގެ ތެރެއިން ފުލުހުންގެ ގަޔަށް ބަޔަކު ކުޅުޖެހި އިރު، ސީޕީ ވަނީ ކޮވިޑް19 ފެތުރެމުންދާ ދުވަސްވަރެއްގައި އެގޮތަށް ކަންކުރުން ބަލައި ނުގަންނާނެކަން ފާހަގަކޮށްފަ އެވެ.
