އެ ޖަމިއްޔާއިން ބުނީ އެހަރަކާތް ކުރިއަށް ގެންދިއުމަށް ހަމަޖެހިފައިވަނީ މިއަދުން ފެށިގެން އޮގަސްޓް މަހުގެ ތިނެއްގެ ނިޔަލަށް ކަމަށެވެ.
ޔޫއެންޑީޕީ އަދި އޮސްޓްރޭލިއަން އެއިޑްގެ އެހީތެރިކަމާއިއެކު، މަސްވެރިންގެ ޖަމިއްޔާއިން، ކުރިއަށްގެންދާ އެހަރަކާތުގައި ހުވަދުއަތޮޅުގެ ވަށައިގެންވާ ކަނޑުއޮޅިތަކަށް ފީނުމުގެ އިތުރުން، ޑައިވްކުރުމުގައި ދިމާވާ އެކިކަންކަމަށް މަސްވެރިންނާއި ޑައިވަރުން ހޭލުންތެރިކުރުމަށް ހާއްސަ ހަރަކާތެއް ކުރިއަށް ގެންދެވޭނެ ކަމަށް އެ ނޫސްބަޔާނުގައި ހާމަކޮށްފައިވެއެވެ.
ޑައިވްސައިޓްތަކުގެ އިލްމީ ދިރާސާއަކާއިއެކު އެހަރަކާތާގުޅޭ ހާއްސަ ޑޮކިއުމެންޓްރީތަކެއް އުފައްދާނެ ކަމަށްވެސް މައުލޫމާތު ލިބިފައިވެއެވެ.
ފޮޓޯ: ދިވެހި މަސްވެރިންގެ ޖަމިއްޔާ
ހޭލުންތެރިކުރުވުމުގެ ހަރަކާތުގައި މަސްވެރިކަންކަމަށް ބޭނުންވާ އެންހިފުމަށްޓަކާ ޑައިވްކުރާއިރު، ޑައިވަރުން ސަމާލުކަން ދޭންވީ ކަންތައްތަކާއި ސަލާމަތާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއި އަދި ޑައިވްކުރުމަށްޓަކާ ޑައިވް ކޯސްހެދުމުގެ މުހިންމުކަމުގެ މައްޗަށް އަލިއަޅުވާލެވޭނެ ކަމަށް އެ ޖަމިއްޔާއިން ބުނެއެވެ. އެ ހޭލުންތެރިކުރުވުމުގެ ކެމްޕެއިން ވާޗުއަލްކޮށް ކުރިއަށް ގެންދިއުމަށް ހަމަޖެހިފައިވަނީ، ފަންނީ މާހިރުން އެ ކެމްޕެއިންގައި ބައިވެރިވާ ގޮތަށް ކަމަށްވެސް ބަޔާންކޮށްފައިވެއެވެ.
ދިވެހި މަސްވެރިންގެ ޖަމިއްޔާއިން އިތުރަށް ބުނީ ހުވަދުއަތޮޅަކީ ދުނިޔޭގެ ނިސްބަތުން އެންމެ ބޮޑު މުރަކައިގެން އަތޮޅަށްވެފައި އެއީ އެއް އަތޮޅެއްގައި އެންމެ ގިނަ ރަށްތައް އުފެދިފައިވާ ހަމައެކަނި އަތޮޅަށްވުމުގެ ޝަރަފާއިއެކު ވޯލްޑް ރެކޯޑް ފޮތުން ޖާގަ ހޯދާފައިވާ އަތޮޅެއް ކަމަށެވެ.
ރާއްޖެއަށް ފީނުމަށް އަންނަ ފަތުރުވެރިންގެ މެދުގައި މަގްބޫލު "ޑީޕް ސައުތް" ގައި ހިމެނޭ ހުވަދުއަތޮޅަކީ، ޑައިވް ސައިޓްތައް ގިނަ އަދި ގުދުރަތީ ރީތިކަން ލިބިފައިވާ ފަރުތަކާއި ރަށްތައް އެކުލެވިގެންވާ އަދި ދޫނިތަކަށް ހާއްސަ ރަށްތަކެއްވެސް ހިމެނިފައިވާ އަތޮޅެއް ކަމަށް އެ ޖަމިއްޔާއިން ބުނެއެވެ.
"ޑިސްކަވަރީ ހަވަދޫ" ގެ ތެރެއިން މިޑައިވް ސައިޓްތަކުގެ ހާލަތު ދެނެގަނެވި، އިލްމީ ގޮތެއްގައި އެތަންތަނުގައި ހުރި ދިރުންތަކާއި ގުޅޭގޮތުން ދިރާސާއެއް ކުރުމަށް ޑާޓާ އެއްކުރެވިގެންދާނެ ކަމަށްވެސް އެ ޖަމިއްޔާއިން ބުނެއެވެ.
އެއިލްމީ ދިރާސާ ކުރިއަށްދާނީ އެކަމުގެ ފަންނީ މާހިރުންގެ އިރުޝާދާއި އެއްގޮތަށެވެ.
އެ ހަރަކާތުގައި ޑައިވްތައް ކުރިއަށްދާނީ އެކަމުގެ އެންމެ މަތީ މިންތީގެ ސަލާމަތާއި ރައްކާތެރިކަމުގެ ފިޔަވަޅުތަކާ އެކުގައި ކަމަށް ފާހަގަކޮށް، ތަޖުރިބާކާރު ޑައިވް އިންސްޓްރަކްޓަރުން އެހަރަކާތުގައި ބައިވެރިވާނެ ކަމަށް ދިވެހި މަސްވެރިންގެ ޖަމިއްޔާއިން ބުނެއެވެ.
މައިގަނޑު ގޮތެއްގައި ޑައިވްތައް ކުރިއަށްދާނީ މަސްވެރިންގެ ޖަމިއްޔާއިން ހޮވާލެވޭ ޑައިވަރުންނާ އެކުގައި ކަމަށް ވެސް ވަނީ ފާހަގަކޮށްފައެވެ. އެފަދަ ހަރަކާތެއް ކުރިއަށް ގެންދަނީ، މިހާރު މުޅި ދުނިޔެއަށް ދިމާވެފައިވާ ކޮރޯނާ ވައިރަހުގެ ބަލިމަޑުކަމާއި ގުޅިގެން ކަމާބެހޭ އިދާރާތަކުން ނަގަންޖެހޭ ހުއްދަތަކާއެކުގައި ކަމަށް މައުލޫމާތު ލިބިފައި ވެއެވެ.
އެ ހަރަކާތުގައި މާލެއިން ބައިވެރިވާ އެކްސްޕާޓުންގެ ޓީމުގެ ޑައިވް ހަރަކާތްތައް ހުވަދުއަތޮޅުގެ ދެކުނު ބިތުގައި މިހާރު ކުރިއަށް ދާކަމަށް އެ ޖަމިއްޔާއިން ފާހަގަކޮށްފައިވެއެވެ. އެގޮތުން އެޓީމުގައި ހިމެނެނީ އަންޑާވޯޓަރް ވީޑިއޯގްރާފަރަކާއި، އެންވަޔަރަމެންޓަލް އެކްސްޕާޓެއްގެ އިތުރުން ކޮމިއުނިކޭޝަންސް ސްޕްޝަލިސްޓެކެވެ.
އެހަރަކާތުގެ ޕާޓްނަރުންނަކީ މެރިން އިކުއިޕްމެންޓްސް، އަޕްނިއާ މޯލްޑިވްސް، އަދި ބޭންކް އޮފް މޯލްޑިވްސްއެވެ. އެހަރަކާތް އިންތިޒާމް ކުރަނީ ޓާކޮއިޝް ލެބުންނެވެ.
