މިއަދުގެ ރައްޔިތުންގެ މަޖިލީހުގެ ޖަލްސާ ފައްޓަވަމުން ރައީސް ނަޝީދު ވިދާޅުވީ ހެލްތު މިނިސްޓްރީން 28 އޭޕްރީލުގައި މަޖިލީހަށް ފޮނުވި ސިޓީގައި ބުނެފައި ވަނީ އިތުރަށް ބޭނުންވާ 75 ވެންޓިލޭޓަރު ހޯދުމުގެ ރާއްޖޭގައި ހުންނަ ޑަބްލިއުއެޗްއޯގެ ކަންޓްރީ ރެޕްރެޒެންޓެޓިވް އޮފިސަރާއި ޔޫއޭއީގެ ޑަބްލިއުއެޗްއޯގެ ކަންޓްރީ އޮފިސަރު މެދުވެރިކޮށް ވެންޓިލޭޓަރުތަކުގެ އަގު ބެލުމަށް ފަހު، ދުބާއީގެ އެގްޒެކިއުޓާސް ޖެނަރަލްގެ އަގު ބެލުމަށް ފަހު ސިންގަލް ސޯސް ޕްރޮކިއުމަންޓެއްގެ ތެރެއިން 20 އޭޕްރީލްގައި ހަވާލުކުރެވިފައިވާ ކަމަށެވެ.
ހެލްތު މިނިސްޓަރުގެ އެ ސިޓީގައި އެހެން އޮތް ނަމަވެސް އޮޑިޓާ ޖެނަރަލްގެ އޮޑިޓް ރިޕޯޓުގައިވާ ކަންކަމާއި އިއްޔެ މާލިއްޔަތު ކޮމެޓީގައި އޮޑިޓާ ޖެނަރަލް ހަސަން ޒިޔަތު ދެެއްކެވި ވާހަކަތަކަށް ބަލާއިރު އެކަމަކީ މަޖިލީހުގެ އިމްތިޔާޒަށް އަރައިގެންފައިވާ ކަމަށެވެ.
75 ވެންޓިލޭޓަރު ހޯދުމަށް ރާއްޖޭގެ ޑަބްލިއުއެޗްއޯ ކަންޓްރީ އޮފީހާއި ޔޫއޭއީގެ ކަންޓްރީ އޮފީސް މެދުވެރިކޮށް އަގު ބެލި ކަމަށް މިނިސްޓްރީން ބުނި ނަމަވެސް އޮޑިޓް ރިޕޯޓުގައިވާ ގޮތުން ޑަބްލިއުއެޗްއޯއާއެކު އެއްވެސް ވިޔަފާރީގެ މުއާމަލާތެއްކޮށްފައި ނުވާ ކަމާއި ޑަބްލިއުއެޗްއޯ އިން ގަބޫލުކުރާ ފެންވަރުގެ ވެންޓިލޭޓަރު ސަޕްލައި ކޮށްދޭނެ ލިސްޓެއް ވެސް ފޯރުކޮށްދީފައެއް ނުވެ އެވެ.
