އިންޑިއާ ސަރުކާރުގެ ހިލޭ އެހީގައި ކ. ގާފަރާއި ރ. މަޑުއްވަރީގައި ގާއިމުކުރުމަށް ހަމަޖެހިފައިވާ ސޯލްޓް ވޯޓާ އައިސްޕްލާންޓްގެ މަސައްކަތް ބީލަމުގެ އުސޫލުން ހަވާލުކޮށްފައިވަނީ ވީ.އޭ.އެމް އެންޑް ކޯ ޕްރައިވެޓް ލިމިޓެޑާ އެވެ.
އެހެންނަމަވެސް ޕީއެސްއެމްގެ ޕްރޮގްރާމްގައި މިނިސްޓަރު ޒަހާ ވިދާޅުވީ އެކުންފުންޏަށް ޕްލޭނާ އެއްގޮތަށް މަސައްކަތް ކުރިއަށް ނުގެންދެވުމުގެ ސަބަބުން މިހާރު އެކުންފުންޏާއެކު ވެފައިވާ އެއްބަސްވުން އުވާލާ އެ މަސައްކަތް ސަރުކާރުގެ މަސް ކުންފުނި، މިފްކޯއާ ހަވާލުކޮށްގެން ކުރިއަށްގެންދިޔުމަށް ނިންމާފައިވާ ކަމަށެވެ.
އެއާއެކު ކުރިއަށް އޮތް ހަތަރު މަސްތެރޭގައި އެ މަސައްކަތް ނިމިގެންދާނެކަމަށް އުއްމީދު ކުރައްވާކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އައިސްޕާލާންޓްގެ މަސައްކަތް ޕްލޭނާ އެއްގޮތަށް ކުރިއަށް ގެންދެވުނު ނަމަ މިއަހަރުގެ މޭއި މަހު މަސައްކަތް އެއްކޮށް ނިންމާލެވޭނެ ކަމަށެވެ.
މިނިސްޓަރު އިތުރަށް ވިދާޅުވީ ފ. ފީއަލީގައި ވެސް އިތުރު އައިސްޕްލާންޓެއް ގާއިމްކުރުމުގެ މަސައްކަތް ކުރިއަށް ދާނެ ކަމަށާއި ސައުދީ ސަރުކާރުގެ އެހީގައި ރާއްޖޭގެ 5 ސަރަހައްދެއްގައި އައިސްޕްލާންޓް ގާއިމްކުރުމުގެ މަސައްކަތް ފެށިފައިވާ ކަމަށެވެ.
