ކޮވިޑާއި ގުޅިގެން އެންޑީއެމްއޭ އިން ހަރަދުކުރި ގޮތުގައި ގިނަ މައްސަލަތަކެއް ފެންމަތިވީ މިމަހުގެ 15 ވަނަ ދުވަހު އާންމުކުރި އޮޑިޓް ރިޕޯޓާއެކު އެވެ. އެ މައްސަލައާ ގުޅިގެން އެންޑީއެމްއޭ އިން އިއްޔެ ހަވީރު ބޭއްވި ނޫސްވެރިންގެ ބައްދަލުވުމުގައި އެތަނުގެ ސީއީއޯ ހިސާން ހަސަން ވިދާޅުވީ ފެސިލިޓީތަކަށް ކާބޯތަކެތި ފޯރުކޮށްދޭން ގާތްގަނޑަކަށް ހަ މިލިއަނެއްހާ ރުފިޔާ ހަރަދުކޮށްފައިވާ ކަމަށާއި އޮޑިޓް ރިޕޯޓުގައި އަގު ކޮންޓްރޯލްކޮށްގެން ވިއްކާ ތަކެތީގެ ތެރޭގައި ބޮޑު އަގުގައި ތަކެތި ގަނެ ފޯރުކޮށްދީފައިވާ ކަމަށް ފާހަގަކުރާ ކަމަށެވެ.
އެގޮތުން 23000 ރުފިޔާގެ މައްސަލައެއްގެ ވާހަކަ ފާހަގަކޮށްފައިވާތީ އެކަމާއި ގުޅިގެން ހިސާން ވިދާޅުވީ އޮޑިޓް ރިޕޯޓުގައި އެކަން ނުބައިކޮށް ފާހަގަކުރާތީ ހައިރާންވާ ކަމަށެވެ. އެ މައްސަލަ އޮޑިޓް ރިޕޯޓުގައި ފާހަގަކުރުމުގެ ކުރިން އެންޑީއެމްއޭއަށް ފާހަގަކުރެވި އެ މައްސަލަ އިސްލާހުކޮށްފައިވާ ކަމަށް ވެސް ވިދާޅުވި އެވެ. ތަކެތި އަގުބޮޑުކޮށް 28000 ރުފިޔާގެ ސާމާނު ގަނެވިފައިވާކަމަށާއި އެ ފައިސާ ހޯދާފައިވާ ކަމަށް ވެސް ވިދާޅުވި އެވެ.
އެކަމާއި ގުޅިގެން ސީއެންއެމް އިން ދެއްވި އިންޓަވިއުއެއްގައި އޮޑިޓް އޮފީހުގެ އޮޑިޓް ޑިރެކްޓާ، އިބްރާހީމް ނައީމް ވިދާޅުވީ އޮޑިޓް ރިޕޯޓުގައި އަގުބޮޑުކޮށް 23000 ރުފިޔާގެ ސާމާނު ގަތް ކަމަށް ފާހަގަކޮށްފައި ވަނީ އޮޑިޓް ސާމްޕަލުން ފާހަގަވަނީ އެވަރުން ކަމުން ކަމަށެވެ.
އަދި އޮޑިޓް ރިޕޯޓް ނިމި، އެބޭފުޅުންނާއެކު ބޭއްވި މަޝްވަރާގެ ބައްދަލުވުމުގައި ވެސް އެ ފައިސާ ލިބިފައިވާ ކަމުގެ ހެކި ލިބިފައި ނުވާ ކަމަށެވެ. އަދި ދައުލަތުގެ އެކައުންޓިން ރިކޯޑުތަކުގައި ވެސް އެ ފައިސާ ހޯދާފައިވާކަން އެނގެން ނެތް ކަމަށް ވިދާޅުވި އެވެ.
އޮޑިޓް ރިޕޯޓުގައި ބުނެފައިވަނީ އެންޑީއެމްއޭ އިން ކޮވިޑް ފެސިލިޓީ ތަކުގައި ތިބި މީހުންނަށާއި ހާލުގައި ޖެހުނު މީހުންނަށް ކެއުމުގެ ކަންކަން ހަމަޖައްސަން ތަކެތި ގަތީ ސަަރުކާރުން ބައެއް ކާބޯ ތަކެތީގެ އަގުކޮންޓްރޯލް ކޮށްފައިވާއިރު ކޮންޓްރޯލް ކޮށްފައިވާ އަގަށްވުރެ ބޮޑުކޮށްކަމަށާ އަދި ބާޒާރުން އެތަކެތި ލިބެން ހުންނަ އަގަށްވުރެ އެތަށްގުނައެއް ބޮޑުކޮށްކަމަށެވެ.
