އޭޑީބީއިން ވަނީ ރާއްޖޭގެ ތަރައްގީއަށް އެހީވުމަށާއި، ކޮވިޑް-19 ގެ ބަލިމަޑުކަމުގެ ސަބަބުން ދިމާވެފައިވާ މާލީ ގެއްލުންތަކުން އަރައިގަތުމަށް އެހީތެރިވުމަށް ކުރިއަށް އޮތް ފަސް އަހަރުގެ މުއްދަތަށް ކަންޓްރީ ޕާޓްނާޝިޕް ސްޓްރެޓަޖީ (ސީޕީއެސް) އެއް ނެރެފަ އެވެ.
މިއަދު ނެރުނު ސީޕީއެސްގެ ދަށުން، ރާއްޖޭގެ މާލީ ހާލަތު ރަނގަޅު ކުރުމަށާއި، ޕްރައިވެޓް ސެކްޓާތައް ތަރައްގީ ކުުރުމަށާއި، ޓެކްސް ނިޒާމް ރަނގަޅު ކުރުމަށް އެހީތެރިކަން ފޯރުކޮށްދޭނެކަމުގެ ޔަގީންކަން އޭޑީބީއިން ވަނީ ދީފަ އެވެ.
ރާއްޖެއަށް ދަރަނީގެ މައްސަލަ އާއި، އިތުރު ގޮންޖެހުންތައް ދިމާވެފައިވާ ކަން އޭޑީބީގެ ބަޔާނުގައި ފާހަގަކޮށްފައި ވެއެވެ.
އެގޮތުން ވަޒީފާގެ ފުރުސަތުތައް މަދުވުމުގެ ސަބަބުން އިގްތިސާދު ތަރައްގީވަމުން އަންނަނީ މަޑު ދުވެއްޔެއްގައި ކަމަށާއި، މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަމަށް އަސަރުކުރާކަން އެ ނޫސްބަޔާނުގައި ބުނެފައި ވެއެވެ.
އޭޑީބީއަކީ ބައިނަލްއަގްވާމީ މުޖުތަމައުގައި ފާހަގަކުރެވޭ ރާއްޖޭގެ އެންމެ މުހިއްމު ތަރައްގީގެ އެއް ޕާޓްނަރެވެ. ކޮވިޑް-19 ގެ ސަބަބުން ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމަށްޓަކައި މި ޖޫން މަހު ވެސް އޭޑީބީ އިން ވަނީ ރާއްޖެއަށް 50 މިލިއަން ޑޮލަރުގެ މާލީ އެހީތެރިކަން ފޯރުކޮށްދީފަ އެވެ.
