އިދިކޮޅު ކޯލިޝަނުން، ސަރުކާރުގެ ދޯހަޅި ސިޔާސަތުތަކުގެ ނަމުގައި މިއަދު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، އާދަމް ޝަރީފް އުމަރު ވިދާޅުވީ، އިގްތިސާދީ ގޮތުން އަޑިވަޅުގަނޑަކަށް ވެއްޓިގެން އުޅޭ މި ދަނޑިވަޅުގައި ވެސް ސަރުކާރުގެ ކޮރަޕްޝަން އިންތިހާއަށް ބޮޑުވެފައިވާ ކަމަށާއި، ވެންޓިލޭޓަރު މައްސަލާގައި ވެސް އެތަކެއް އޮޅުވާޅުންތަކެއް އުޅޭ ކަމަށެވެ.
އެގޮތުން ވެންޓިލޭޓަރު މައްސަލާގައި ޒިންމާވާންޖެހޭ އިތުރު ވަޒީރުން އެބަތިބި ކަމަށާއި، މިހާ ބޮޑު މައްސަލައެއްގައި އެންމެ ބޭފުޅަކު ޒިންމާ ނަންގަވާފައި މައްސަލަ ނިންމާލުން އެއީ ސަރުކާރުން ހެދި ޑީލެއްގެ ދަށުން ކުރި ކަމެއް ކަމަށް އާދަމް ޝަރީފް ވަނީ ތުހުމަތު ކުރައްވާފަ އެވެ.
ކުރީގެ ޑިފެންސް މިނިސްޓަރު އަދި މިހާރު މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ، އެ މައްސަލާގައި، އެހާ ގިނަ އަދަދެއްގެ ފައިސާ ދޫކޮށްފައި ވަނީ އެގްރިމެންޓުގައި ސޮއެކުރުމުގެ ކުރިންކަން، އޮޑިޓް ރިޕޯޓުން ސާފުކޮށް ހާމަވާން އޮތްއިރު، އެންމެ ބޭފުޅެއްގެ ބޮލުގައި މައްސަލަ އެޅުވުމަށް ފަހު ނިންމާލުމަކީ ވަރަށް ޒިންމާދާރުކަން ކުޑަ ގޮތެއް ކަމަށެވެ.
އަދި މި މައްސަލާގައި އެންމެ ވަޒީރަކަށް ފިޔަވަޅު އަޅާފައި ދޫކޮށްލުން އެއީ، މި ސަރުކާރުން ވަކި ބަޔަކު ހިމާޔަތް ކުރުމަށް ގެންގުޅޭ ސިޔާސަތެއް ކަމަށް އާދަމް ޝަރީފް އުމަރު ވަނީ ސިފަކުރައްވާފަ އެވެ.
ކޮވިޑް-19 އާ ގުޅިގެން ރާއްޖެއަށް 75 ވެންޓިލޭޓަރު ގެނައުމުގައި މަގާމުގެ ނުފޫޒު ބޭނުންކޮށްގެން ވަކި ބަޔަކަށް ފައިދާވާ ގޮތަށް އަމަލުކޮށްފައިވާ ކަމަށް ތުހުމަތު ކުރެވޭތީ، ކުރީގެ ހެލްތު މިނިސްޓަރު އަބްދުﷲ އަމީން ހިމެނިވަޑައިގަންނަވާ ގޮތަށް 11 ފަރާތެއްގެ މައްޗަށް ދައުވާކުރުމަށް އެދި އޭސީސީން މައްސަލަ ތަހުގީގު ކުރުމަށް ފަހު ޕީޖީއަށް ފޮނުވުން، ޕީޖީން ވަނީ އެ މައްސަލާގައި ދައުވާ ކުރެވޭނެ މިންވަރަށް ހެކި ނެތް ކަމަށް ފެންނާތީ ދައުވާ ނުކުރަން ނިންމާފަ އެވެ.
އޭގެ ފަހުން ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ މެމްބަރުން، މިނިސްޓަރު އަމީންގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅި ފަހުން މިނިސްޓަރު ވަނީ މަގާމުން އިސްތިއުފާ ދެއްވާފަ އެވެ. އަދި މިހާރު މި މައްސަލަ އަންނަނީ މަޖިލީހުގެ ޖުޑީޝަރީ ކޮމިޓީން ދިރާސާ ކުރަމުންނެވެ.
