ހަސަން ލަތީފް ވިދާޅުވީ ކުޅިވަރާ ބެހޭ ވަޒީރަކަށް އޮންނަންވާނެ އެންމެ މުހިންމު ބާރަކީ ކުޅިވަރާއި ބެހޭ ސިޔާސަތު ކަނޑައެޅުމުގެ ބާރުކަމަށާއި އެ ބާރު ގާނޫނަށް ހުށަހަޅާފައިވާ އިސްލާހްތަކުގެ ތެރެއިން ވަޒީރަށް ލިބިދެވޭގޮތަށް ގާނޫނުގައި ހިމަނާފައިވާނެ ކަމަށެވެ.
ލަތީފު ވިދާޅުވީ އޭގެ ތެރޭގައި ވަޒީރު އަދާކުރަންޖެހޭ މައިގަނޑު މައްސޫލިއްޔަތުތައް ވެސް ހިމެނެފައިވާނެ ކަމަށެވެ. އެގޮތުން ވަޒީރެއް ކުޅިވަރަށް ކޮށްދެންޖެހޭ އެންމެ މުހިންމުކަމަކީ ބޭރުގެ ގައުމުތަކުން ރާއްޖޭގެ ކުޅިވަރުތަކައް ފުރުސަތުތަކެއް ހޯދައިދިނުން ކަމަށެވެ. އެއީ ކުޅިވަރުތަކަށް މީހުން ތަމްރީން ކުރުމާއި ކުޅިވަރުތައް ކުރިއެރުވުމަށް ބޭރުގެ ފަަރާތްތަކުން އެހީ ހޯދުމުގެ އިތުރުން ކުޅިވަރު ކުރިއަރާނެ ހުރިހާ ގޮތަކުން ބޭރު ގައުތަކުންވެސް ކުޅިވަރަށް އެހީ ލިބޭނެ ފުރުސަތުތައް ހޯދައިދިނުމަކީ ވަޒީރުގެ މަސްއޫލިއްޔަތުތަކުގެ ތެރޭގައި ހިމެނޭ ކަންކަން ލަތީފް ފާހަގަކުރެއްވި އެވެ.
ކުޅިވަރު ގާނޫނަށް ހެންވޭރު ހަސަން ލަތީފް ހުށަހެޅުއްވި ބައެއް އިސްލާހުތަކާއެކު ގިނަ ކުޅިވަރުތަކުން ރާއްޖެ ސަސްޕެންޑްކުރާނެ ކަމަށް ވިދާޅުވެ ޔޫތު މިނިސްޓަރު އަހުމަދު މަހްލޫފް ވަނީ ކަންބޮޑުވުުން ފާޅުކުރައްވާފަ އެވެ. ރައީސް އިބްރާހީމް މުހައްމަދު ސޯލިހުގެ މެނިފެސްޓޯއާ އެއްގޮތަށް ކުޅިވަރު ސިޔާސީ ނުކޮށް ދާނީ ކުރިއަށް ކަމަށާއި އެސޯސިއޭޝަންތަކުގެ އިންތިހާބު ހިންގާނީ ޑިމޮކްރަޓިކްކޮށް ގާނޫނު ނުވަތަ އިންޓަނޭޝަނަލް ފެޑްރޭޝަންތަކުގެ ގަވާއިދުތަކާއި އެއްގޮތަށް ކަމަށް ވެސް މަހްލޫފް ވަނީ ވިދާޅެވެއެވެ.
ރާއްޖޭގެ ކުޅިވަރުތައް ސަސްޕެންޑް ކުރާނެކަމުގެ ކަންބޮޑުވުންތަކަށް ޖަވާބުދެއްވާ ހަސަން ލަތީފް ވިދާޅުވީ އެކަމުގައި ތަޖުރިބާހުރި ލޯޔަރުންނާއިވެސް ވާހަކަ ދައްކަވާފައި ވާނެކަމަށާއި އިންތިހާބެއް ބޭއްވުމަކީ އޮލިމްޕިކް ޗާޓާއާއި ހިލާފްކަމެއް ނޫންކަމަށެވެ. އެހެންނަމަވެސް ކޮންމެތަނެއްގައި ވެސް ނުފޫޒް ފޯރުވާނަމަ އެ ފަރާތަކުން ސަސްޕެންޑްކޮށް ފިޔަވަޅު އެޅުން އޮންނަކަމަށާއި އެހެންނަަމަވެސް އެސޯސިއޭޝަންގެ އިންތިހާބު ގާނޫނަކުން އެކަން ކަނޑައަޅައިގެން އެހެން ފަރާތަކުން ބާއްވާތީ އެއީ ބޭރުގެ ފެޑެރޭޝަންތަކުން ފިޔަވަޅު އަޅާނެކަމެއް ނޫންކަމަށް އޭނާ ވިދާޅުވި އެވެ.
އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ރާއްޖެ ސަސްޕެންޑް ކޮށްފާނެ ކަމުގެ އިންޒާރުގެ ސިޓީގެ ކޮޕީއެއް އެމަނިކުފާނަށް ލިބިފައިވާކަމަށް ވިދާޅުވެ މަހްލޫފް މީގެ ކުރިންވެސް ވަނީ ސަރުކާރާއި މަޖިލީސް އަދި ކޯޓުތަށް ކުޅިވަރުގެ ތެރެއަށް ވަންނަނަމަ ކުޅިވަރުތަކުން ރާއްޖެ ސަސްޕެންޑް ކުރުމުގެ ފުރުސަތު ބޮޑުކަމަށް ވިދާޅުވެފަ އެވެ.
