ޕީއެސްއެމް ނިއުސްއިން ގެނެސްދިން "ސަރުކާރަށް ދެ އަހަރު" ޕްރޮގްރާމްގައި ވާހަކަދައްކަވަމުން ރައީސް ގެ އިރުޝާދުގެ ދަަށުން މާވަރުލާއި ކުޅުދުއްފުށީގެ އެއާޕޯޓު މިހާރު ހުޅުވުފައިވާކަން ފާހަގަކުރައްވާ މިނިސްޓަރު ނަހުލާ ވިދާޅުވީ މިހާރު މަސައްކަތް ކުރަމުންދަނީ މަޑިވަރުގެ އެއާޕޯޓު މި މަސްތެރޭގައި ހުޅުވުމަށް ކަމަށެވެ.
އަދި އެއާޕޯޓް މިމަހުގެ ތެރޭގައި ހުޅުވިގެންދާނެކަމަށް މިނިސްޓަރު ވިދާޅުވިއެވެ. މަޑިވަރު އެއާޕޯޓަކީ ރައީސް ޔާމީންގެ ވެރިކަމުގައި 2018 ވަނަ އަހަރުގެ އޮކްޓޫބަރު މަހު މަސައްކަތް ފަށާފައިވާ މަޝްރޫއުއެކެވެ.
އޭގެ އިތުރުން ހޯރަފުށީގެ އެއާޕޯޓް 2021 ވަނަ އަހަރުގެ ކުރީކޮޅު ހުޅުވިގެންދާނެކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އޭގެ އިތުރުން މިއަންނަ އަހަރުގެ ތޭރޭގައި ތުޅާދޫގައިވެސް އެއާޕޯޓެއް އެޅުމުގެ ޕްލޭނެއް ކުރެވިފައިވާ ކަމަށެވެ. މިނިސްޓަރު ވިދާޅުވީ މ. މުލީގައި އެޅޭ އެއާޕޯޓާއިއެކު ރާއްޖޭގެ ހުރިހާ ސަރަހައްދަކަށްވެސް 35 މިނިޓުން ދަތުރުތައް ކުރެވޭނެކަމަށެވެ. އެހެންނަމަވެސް ރާއްޖޭގެ ރަށްތައް ހުރި ގޮތުން ހދ. މަކުނުދޫ އާއި އެއާޕޯޓްތައް ދުރުކަމަށެވެ. އެހެންކަމުން ކުރިއަށް އޮތްތަނުގައި މަކުނުދޫއަށް ވައިގެ މަގުން ދަތުރުތައް ކުރެވޭނެ ފަހިގޮތެއް ހަމަޖެއްސުމުގެ ވިސްނުން އެބަހުރިކަަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެކަމާ ގުޅޭގޮތުން މަޝްވަރާތައް ވެސް ކުރެވިފައިވާ ކަމަށާއި އެހެންކަމުން އެކަން ވެސް ވަރަށް އަވަހަށް ހަމަޖެހިގެންދާނެކަމަށެެވެ.
