ޕޮގްބާއާ ހަވާލާދީ ޔޫރަޕުގެ ބައެއް މީޑިއާ ރިޕޯޓްތައް ބުނާ ގޮތުގައި ޕޮގްބާއަށް ޔުނައިޓެޑުގައި މި ފަހަކުން އައިސް ކުޅެން ފުރުސަތު ލިބޭލެއް މަދުވުމުން އޭނާ ހުރީ އެކަމާއި މެދު ހިތްހަމަ ނުޖެހިފައެވެ. މި ސީޒަންގައި މިހާތަނަށް ދިހަ މެޗުގައި ޕޮގްބާ ކުޅެފައިވާއިރު އޭނގެ ތެރެއިން ފަސް މެޗުގައި އޭނާއަށް ފުރަތަމަ އެގާރައިން ފުރުސަތު ލިބިފައެއް ނުވެއެވެ. އެކަމާއި ޕޮގްބާ ހިތްހަމަ ނުޖެހޭއިރު، އޭނާ ބުނި ގޮތުގައި މިއީ އޭނާގެ ކެރިއަރުގެވެސް އެންމެ އުނދަގޫ ވަގުތެވެ.
ޕޮގްބާއާ ގުޅޭ ގޮތުން މީޑިއާ ރިޕޯޓްތައް އާއްމުވީ، އޭނާ ފްރާންސްގެ ގައުމީ ޓީމާއެކު ހުރި ދަނޑިވަޅެއްގައެވެ. ޔުނައިޓެޑާ ޕޮގްބާއާ ދެމެދު އޮތް އެއްބަސްވުން އަންނަ ޖޫން މަހުގެ ނިޔަލަށް ހަމަވާއިރު، ޕޮގްބާ ވިއްކާލަން ޔުނައިޓެޑުން ބޭނުންވާކަމުގެ ރިޕޯޓްތަކެއްވެސް މި ފަހުން މީޑިއާގައި ތިލަވިއެވެ.
ޔުނައިޓެޑުން ޕޮގްބާ ދޫކޮށްލުމުގެ ރިޕޯޓްތައް އާއްމުވީ، ޔުނައިޓެޑްގެ ކޯޗު އޮލެ ގުނަ ސޯލްޝެއާގެ ޕްލޭނުގެ ތެރެއިން ޕޮގްބާއަށް ފުރުސަތު ލިބުން މަދުވެފައިވާ ދަނޑިވަޅެއްގައެވެ.
