އެމްޓީސީސީ އިން އަަތޮޅުތަކުގައި ކުރިއަށް ގެންދާ މަޝްރޫއުތައް ބައްލަވައިލެއްވުމުގެ ގޮތުން އާޒިމްގެ އިތުރުން އެ ކުންފުނީގެ ޗެއާމަން މުހައްމަދު ފަހީމް ނ. އަތޮޅުގެ ބައެއް ރަށްތަކަށް ކުރެއްވި ޒިޔާރަތުގައި އިއްޔެ އެ އަތޮޅުގެ ހެނބަދޫ އަށް ވަޑައިގެން އެ ރަށުގައި ހަދާފައިވާ ބަނދަރު ބައްލަވާލައްވާފައިވެއެވެ.
ބަނދަރު ބައްލަވައި ލެއްވުމަށްފަހު ހެނބަދޫ ސްކޫލްގައި އެ ރަށުގެ ބައެއް އާންމުންނާއި ބައްދަލުކުރައްވައި، އާޒިމް ވަނީ އެ ކުންފުނިން އެ ރަށުގައި ހަދާފައިވާ ބަނދަރުގެ ސަބަބުން އެ ރަށުގައި ދިރިއުޅޭ އާންމުންނަށް ވާނެ ފައިދާތަކާއި ބެހޭ ގޮތުން ވާހަކަފުޅު ދައްކަވައިފައެވެ.
އެއަށްފަހު، އާޒިމް ވަނީ އެ އަތޮޅުގެ މިލަދޫގައި ކުރިއަށްދާ ބަނދަރު ތަރައްގީ ކުރުމުގެ މަޝްރޫއުގެ މަސައްކަތް ކުރިއަށްދާ ގޮތް ބައްލަވައިލެއްވުމަށްޓަކައި އެ މަޝްރޫއު ކުރިއަށްދާ ސަރަހައްދަށް ވަޑައިގެންފައެވެ.
އެ ރަށުގެ ބަނދަރު ތަރައްގީ ކުރުމުގެ މަޝްރޫއުގެ ދަށުން 37،222 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 248 މީޓަރުގެ ސަރަހައްދެއްގައި ބޭރުތޮށި ލުމާއި، 137 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި، 286 މީޓަރުގެ ސަރަހައްދެއްގައި އެއްގަމު ތޮށި ލުމާއި، 1،430 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމުގެ އިތުރުން ނެރު ބައްތި ޖެހުމާއި މަގު ބައްތި ޖެހުން ފަދަ މަސައްކަތްތައް ކުރާނެއެވެ.
މިދިޔަ މަހުގެ 21 ގައި ނ. ހެނބަދޫގެ ބަނދަރު ހެދުމުގެ މަޝްރޫއު ނިމިފައިވާ އިރު، މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އިން އެމްޓީސީސީ އާއި އެ މަޝްރޫއު ހަވާލުކޮށްފައި ވަނީ 26.6 މިލިއަން ރުފިޔާ އަށެވެ.
އެ އަތޮޅުގެ މިލަދޫގައި ހިންގާ ބަނދަރު ތަރައްގީ ކުރުމުގެ މަޝްރޫއުގެ 34 އިންސައްތަ މަސައްކަތް ނިމިފައިވާ އިރު، ޕްލޭނިން މިނިސްޓްރީ އިން އެމްޓީސީސީ އާއި އެ މަޝްރޫއު ހަވާލުކޮށްފައި ވަނީ 42.18 މިލިއަން ރުފިޔާ އަށެވެ.
އެމްޓީސީސީ އިން ރާއްޖޭގެ އެކި ސަރަހައްދުތަކުގައި ތަރައްގީގެ މަޝްރޫއުތައް ކުރިއަށް ގެންދާއިރު، މި އަހަރު އެކަނިވެސް 70 އަށް ވުރެ ގިނަ މަޝްރޫއު ކުރިއަށްދާ ކަމަށް އެ ކުންފުނީގެ ތަފާސްހިސާބުތަކުން ދައްކަ އެވެ.
