މިއަދު ޑެންމާކްގެ ބޮޑުވަޒީރު މެޓް ފްރެޑްރިކްސެން ވިދާޅުވީ އެގައުމުގައި ކޮވިޑް-19 ހަލުވިކަމާއި އެކު ފެތުރެމުންދާތީ، ބަލި ކޮންޓްރޯލް ކުރުމަށްޓަކައި ފިޔަވަޅުތައް ވަރުގަދަކުރަން ނިންމާފައިވާ ކަމަށެވެ.
އެގޮތުން މި މަހުގެ ނުވަވަނަ ދުވަހުން ފެށިގެން އަންނަ މަހުގެ ތިންވަނަ ދުވަހާއި ހަމައަށް ޑެންމާކްގެ ބާތަކާއި ރެސްޓޯރަންޓްތަކާއި ސިނަމާތައް ބަންދުކުރާ އިރު، ސްކޫލްތަކާއި ޔުނިވާސިޓީތައް ބަންދުކޮށް ދަރިވަރުން ގޭގައި މަޑުކުރުމަށް އަންގާފައިވެ އެވެ.
ޔޫރަޕްގެ ގައުމުތަކުގެ ތެރެއިން ކޮވިޑް-19 ޖެހޭ މީހުންގެ އަދަދު އެއްވަރެއްގައި ހިފެހެއްޓުނު މަދު ގައުމުތަކުގައި ހިމެނުނު ޑެންމާކްގައި ހަލުވި ކަމާއިއެކު ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރުވަމުން އަންނަ އިރު، މި މަހުގެ ފަސްވަނަ ދުވަހު އެކަނިވެސް ރެކޯޑް އަދަދަކަށް އެ ގައުމުގެ މީހުންނަށް ކޮވިޑް-19 ޖެހިފައިވެ އެވެ.
މިހާތަނަށް ޑެންމާކްގައި 93،000 އަށް ވުރެ ގިނަ މީހުންނަށް ކޮވިޑް-19 ޖެހިފައިވާ އިރު، އެ ބަލީގައި މަރުވެފައިވަނީ 885 މީހުންނެވެ.
