ނޫސްވެރިޔާ ރިލްވާން ވަގަށް ނަގައިގެން ގެންގޮސް މަރައިލި މައްސަލައާއި، ޔާމީން ރަޝީދު މަރާލި މައްސަލާގައި މިހާތަނަށް އިންސާފު ހޯދިފައި ނެތީ ސަރުކާރު ބައެއް މުއައްސަސާތަކުގައި ޖަރީމާ ފޮރުވަން އުޅޭބަޔަކު ތިބުމުން ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
Advertisement
ނަޝީދު މިހެން ވިިދާޅުވީ "އާސްކް ސްޕީކާ" ޕްރޮގުރާމުގައި، ރިލްވާން އަދި ޔާމީން މައްސަލާގައި "ސްޓިސް" ލިބިފައި ނެތީ ކީއްވެތޯ ކުރެވުނު ސުވާލަށް ޖަވާބު ދެއްވަމުންނެވެ.
ނަޝީދު ވިދާޅުވީ، ސީދާ މިވެނި ސަބަބެކޭ ވިދާޅުވާން ދަތި ކަމަށެވެ. ނަމަވެސް ދައުލަތުގެ އެކި މުއައްސަސާތަކުގައި އެ ޖަރީމާތަށް ފޮރުވުމަށް މަސައްކަތް ކުރާ ފަރާތްތަކެއް އެބަތިބި ކަމަށާއި. އެ މުއައްސަސާތަކުގެ ތެރެއިން އެމައްސަލަތައް ތަހުގީގުކޮށް ދައުވާއެއް ނުކުރެވިގެން އުޅެނީ މި ސަބަބާއި ހުރެކަމަށް ނަޝީދު ވިދާޅުވިއެވެ.
"މިހިން މިވެނި ވަކި އެއްކަމެކޭ އަޅިގަނޑަށް ދަންނަވަން ވަރަށް ދަތި، އެހެންނަމަވެސް އެކިއެކި މުއައްސަސާތަކުގެ ތެރޭގައި އެ ޖަރީމާތަށް ފޮރުވުމަށް، ނުވަތަ އެ ޖަރީމާތަކާއި ގުޅޭގޮތުން އެހާބޮޑެތި ރުޅިވެރިކަމާއި ދެރަވުމާއި އެކަންކަން ހިތުގެތެރޭގަ ނޫފުދޭ ބާވަތުގެ މީހުން އެބައުޅޭ މި ދައުލަތުގެ އެކިއެކު މުއައްސަސާތަކުގެ ތެރޭގަ.. އެހެންވީމަ އެ މުއައްސަސާތަކުގެ ތެރެއިން ތަހުގީގުތަށް ހިންގިގެން ދައުވާތަށް ކުރެވެން ދަތިވެގެން މިދަނީ.." ނަޝީދު ވިދާޅުވިއެވެ.
ނަޝީދު ވިދާޅުވީ ރިލްވާންގެ މައްސަލައާއި ޔާމީން ރަޝީދުގެ މައްސަލާގެ އިތުރުން ޑރ. އަފްރާޝީމްގެ މައްސަލަވެސް ބެލޭނެ ކަމަށާއި، އަދި އިންސާދުވެސް ހޯދޭނެ ކަމަށެވެ.
