އީއައިބީ ކޮވިޑް ރިލީފް ލޯނަށް ހުޅުވާލާފައިވާ އިރު، ބީއެމްއެލް އިން އެސްއެމްއީ ވިޔަފާރިތަކަށް ލޯން ދޫކުރާނީ ހަ އިންސައްތައިގެ އިންޓްރެސްޓް ރޭޓެއްގަ އެވެ. 15.42 މިލިއަން ރުފިޔާ އާއި ހަމައަށް އެ ލޯނުގެ ދަށުން ފައިސާ ދޫކުރާނެ ކަމަށް ބީއެމްއެލުން ބުނެއެވެ.
ހަތް އަހަރުގެ މުއްދަތެއްގައި ދައްކައި ނިންމަންޖެހޭ އެ ލޯނަކީ ކޮވިޑް-19 އާއި ގުޅިގެން މާލީގޮތުން އަސަރުކޮށްފައިވާ ވިޔަފާރިތަކަށް ހާއްސަ ލޯނެއް ކަމަށް ބީއެމްއެލުން ވަނީ ބުނެފައެވެ.
މީގެ ކުރިންވެސް އީއައިބީ އިން ވަނީ އޭޝިޔާގެ ގައުމު ތަކަށް ކޮވިޑް-19 ގެ ސަބަބުން ލިބެމުންދާ ގެއްލުން ތަކުން އަރައިގަތުމަށްޓަކައި އެ ބޭންކުން އިއުލާންކުރި 5.2 ބިލިއަން ޔޫރޯގެ އެހީތެރިކަމުގެ ދަށުން މިއަހަރުގެ ޖޫން މަހު ރާއްޖެއަށް 20 މިލިއަން ޔޫރޯގެ ލޯނެއް ދޫކޮށްފަ އެވެ.
އީއައިބީ އިން ދޫކުރި އެ ލޯނުގެ ސަބަބުން ރާއްޖޭގެ އިގްތިސާދު ހަލުވި މިނެއްގައި ރަނގަޅުވާނެ ކަމަށާއި އެ އެހީތެރިކަމަކީ ކޮވިޑް-19 އަށް ފަހު އިގްތިސާދު އާރާސްތުކޮށް އެސްއެމްއީ ވިޔަފާރިތައް ސަލާމަތްކުރަންދޭ އެހީތެރިކަމެއް ކަމަށް އީއައިބީގެ ނައިބު ރައީސް އެންޑްރޫ މެކްޑޯވެލް ވަނީ ވިދާޅުވެފަ އެވެ.
