އުރީދޫގެ ބްރޭންޑް އެމްބެސެޑަރު ސާޖިން މިގޮތަށް ބުނެފައި މިވަނީ ޓީވީ ޗެނަލެއްގައި މިނިސްޓަރު ޒަހާ، މިވަގުތުގެ ފްލޯ ޕްރައިޒް އަށް ބަލާއި، މިހާރު މަހަކު މަސްވެރިއަކަށް އެވްރެޖްކޮށް 22،000 ރުފިޔާ ލިބޭނެކަމަށް ވިދާޅުވުމާއި ގުޅިގެންނެވެ.
މިނިސްޓަރު ވިދާޅުވި ގޮތުގައި ކުރިން އޮތް ގޮތުންނަމަ މަހެއްގެ މައްޗަށް މަސްވެރިއަކަށް ޖެހުނީ 11،500 ރުފިޔާ އެވެ.
އެކަމާއި ގުޅިގެން ސާޖިން ކުރި ޓްވީޓެއްގައި ބުނީ، "ހަމަ ޔަގީނުން ވެސް މަށަކަށް ނުލިބޭ،" ކަމަށެވެ.
މަސްވެރިންގެ ގިނަ ކަންބޮޑުވުންތަކެއް އެބަ ހުއްޓެވެ. މިފަހުން ވެސް ފެލިވަރުގައި މަސްވެރިންތަކެއް ވަނީ މުޒާހަރާކޮށްފަ އެވެ. އެގޮތުން މަހަށް ހަމަ އަގު ނުލިބުމާއި އައިސް ލިބުމުގައި ދަތިތައް ހުރުމުގެ ކަންބޮޑުވުން ފާޅުކޮށްފައިވާއިރު އެ ދުވަހު ވަނީ މިނިސްޓަރުގެ އިސްތިއުފާއަށް ވެސް ގޮވާލާފަ އެވެ.
މީގެ ކުރިން ވެސް މަސްވެރިންނަނަށްވީ ވައުދު ފުއްދުމަށް މަސައްކަތް ނުކުރާތީ މަސްވެރިން މުޒާހަރާތައްކޮށްފައި އެބަހުއްޓެވެ. އަދި މިނިސްޓަރުގެ އިސްތިއުފާއަށް އޭރު ވެސް ގޮވިޔެވެ. މަސްވެރިން ބުނަމުންދަނީ އެމީހުންގެ އަޑު ސަރުކާރުން ނާހާ ކަމަށެވެ.
