ރާއްޖޭގެ ޅެންވެރިންގެ ދުވަސް ނިސްބަތްކުރެވެނީ މަޝްހޫރު ޅެންވެރިޔާ އަދި ދިވެހި އަދީބު އަލްއުސްތާދު އިބްރާހީމް ޝިހާބަށެވެ. ޅެންވެރިންގެ ދުވަހުގެ ގޮތުގައި ފާހަގަކުރާ ދުވަހަކީ އެމަނިކުފާނު ދެމިއޮތުމުގެއާލަމަށް ދަތުރުކުރެއްވި ދުވަހެވެ. އަލްއުސްތާދު އިބްރާހީމް ޝިހާބަކީ ދިވެހިބަހާއި އަދަބަށް ހާއްސަކޮށް ދިވެހި ޅެންވެރިކަމަށް ގިނަގުނަ ހިދުމަތްތަކެއް ކުރެއްވި މަޝްހޫރު ޅެންވެރިއެކެވެ. އެމަނިކުފާނަކީ ދިވެހި އަދަބީ ގުލްޝަނުގެ ޝާއިރުއް ޝަބާބެވެ.
ސަރުކާރުން ވަނީ 1988 ވަނަ އަހަރުގެ ޖެނުއަރީ މަހުގެ 15ވަނަ ދުވަހު ޅެންވެރިންގެ ދުވަހުގެ ގޮތުގައި އޭގެފަހުން އެދުވަސް ކަނޑައެޅުއްވާފަ އެވެ. އެއާ ގުޅިގެން ކޮންމެ އަހަރެއްގައި ވެސް މިދުވަސް ފާހަގަކުރަމުން އަންނަނީ ޅެންވެރިންގެ އަގުވަޒަންކޮށް ޅެންވެެރިކަން ދިރުވައި އާލާކޮށް ޅެންވެރިންނަށް ހިތްވަރުދޭ ދުވަހުގެ ގޮތުގައެވެ. އެގޮތުން މިއަދަކީ މިއަދަކީ ރާއްޖޭގެ 32 ވަނަ ޅެންވެރިންގެ ދުވަހެވެ.
މިއަހަރު ޅެންވެރިންގެ ދުވަސް ފާހަގަކުރުމުގެ ގޮތުން ދިވެހި ބަހުގެ އެކެޑަމީން ހާއްސަކޮއްފައިވަނީ އައްނަބީލާ އަލްމަރުޙޫމާ ފާތިމަތު ސައީދުގެ ހަނދާނަށެވެ. އެކަމަނާއަކީ ދިވެހި އަދަބީ ބަގީޗާގެ ނަރުގިސްމަލެވެ. އައްނަބީލާ ފާތުމަތު ސައީދަކީ މަޝްހޫރު އިލްމުވެރިޔާ އަދި އަދީބު ފަސީލަތުއްޝައިހުލް މަރްހޫމް ހުސެއިން ސަލާހުއްދީންގެ ދަރިކަނބަލުންގެ އިތުރުން އެކަމަނާއަކީ ރާއްޖޭގެ ކުރީގެ ރައީސް އަދި މަޝްހޫރު އަދީބު ސުމުއްވުލްއަމީރު މުހައްމަދު އަމީން ދޮށިމޭނާ ކިލެގެފާނުގެ ފުރަތަމަ އަނބުކަނބަލުންނެވެ.
މިއަހަރުގެ ޅެންވެރީންގެ ދުވަހަށް ކަނޑައެޅިފައިވާ ޝިއާރަކީ " ތެދުވާށެ އަލުން އާ ދިރުމެއް ދޭނެ ގޮތެއްގައި..." މިއެވެ. މިއީ އައްނަބީލާ ފާތިމަތު ސައީދު "އޭ ދިވެހި ގައުމާއެވެ!" މި ސުރުހީއަށް ހެއްދެވި ޅެމުގެ ފުރަތަމަ ބައިތުގެ ފުރަތަމަ މިސްރާއެވެ.
މިއަހަރު އެ ޝިއާރުގެ ގޮތުގައި ކަނޑައެޅީ މިއަހަރު ޅެންވެރިންގެ ދުވަސް ބައްދަލުކުރިއިރު މުޅި ދުނިޔެއާއި ރާއްޖެއަށް ވެސް ކުރިމަތިވެފައިވާ ކޮވިޑް-19 ގެ ނުރައްކަލުގެ ނުތަނަވަސްކަމުން އަރައިގަތުމަށް ހިތްވަރު ދިނުމުގެ ގޮތުންކަމަށް ދިވެހި ބަހުގެ އެކަޑަމީން ވިދާޅުވެ އެވެ. އަދި މި އަޑިގުޑުންގަނޑުން އަރައިގަތުމަށް ހުރިހާ ދިވެހިންނަށް ވެސް އާ އަޒުމަކާއި އާ ހިތްވަރަކާއެކު ކުރިއަށް ދިޔުމުގެ އުއްމީދު އާކޮށްދިނުމަށްކަމަކީ ވެސް މިކަމުގެ މަގުސަދެކެވެ.
މިއަހަރުގެ ޝިއާރުން ބާރު އަޅަނީ ކޮވިޑް-19 ގެ ސަބަބުން އަޅުގަނޑުމެންނަށް ގެނުވި މާޔޫސްކަން ފިލުވައިދީ ކަންބޮޑުވުންތަކުން ދުރުހެލިކޮށްދީ އުންމީދުތަކުން އުފާލިބިދިނުމުގެ މުހިންމުކަމުގެ މައްޗަށްކަމަށް ދިވެހިބަހުގެ އެކަޑަމީން ބުނެ އެވެ.
މިއަހަރުގެ ޅެންވެރިންގެ ދުވަހާ ގުޅިގެން ވެސް ހާއްސަ ހަރަކާތްތަކެއް ކުރިއަށްގެންދިޔުމަށް ވަނީ ނިންމާފައެވެ. އެގޮތުން ސަމާސާ ޅެން ހެދުމުގެ މުބާރާތެއް ބޭއްވުމާއި، އެކެޑަމީން ޅެންވެރިކަމުގެ ހުނަރު ދަސްކޮށްދިން އެންމެހައި ފަރާތްތައް ޝާމިލްކޮށްގެން އޮންލައިން ވެބިނާއެއް ބޭއްވުމާއި ޅެންވެރީންގެ ފޮތްތައް ނެރުމާއި އިހާއި ފަހުގެ ޅެންވެރީންގެ ޅެންތައް މީސްމީޑީޔާގައި އާންމުކުރުމުގެ ކެމްޕޭނެއް ކުރިޔަށް ގެންދިޔުމާއި ދުވަހާ ގުޅޭ ހާއްސަ ލުއި ފޮތެއް ނެރުމުގެ އިތުރުން ދުވަހުގެ ހާއްސަ ޖަލްސާވެސް ބޭއްވުމަށްވަނީ ނިންމާފަ އެވެ.
