މިފަދަ މޭރުމަކުން ރައީސް ޓްވީޓް ކުރައްވާފައި މިވަނީ ޅެންވެރިންގެ ދުވަހުގެ ތަހުނިޔާއާ ހެޔޮ އެދުންތައް ދިވެހި ޅެންވެރިންނަށް އަރިސްކުރައްވާ ކުރެއްވި ޓްވީޓެއްގަ އެވެ.
ރައީސް ވިދާޅުވީ ޅެންވެރިކަމަކީ އަދަބިއްޔާތަށް މުއްސަނދިކަން ގެނެސްދޭ ފަންނެއް ކަމަށާއި އަދި މިއީ އިންސާނާގެ އެންމެ ފުން އިހްސާސްތަކާ ގުޅިފައިވާ ފަންނެއް ކަމަށެވެ. ރައީސް ވިދާޅުވީ މި ފަންނު ފަހުގެ ޖީލުތަކާ ހަމައަށް ވާސިލުކޮށްދޭންޖެހޭ ކަމަށެވެ.
ރައީސް ސޯލިހުގެ ކުރީގެ ރައީސް މައުމޫން އަބްދުލްގައްޔޫމް ވެސް ވަނީ ޅެންވެރިންގެ ދުވަހުގެ ތަހުނިޔާ ފޮނުއްވާ ޓްވީޓް ކުރައްވާފަ އެވެ. އެގޮތުން ވިދާޅުވީ ޅެންވެރިކަމަކީ އަދަބީ އުފެއްދުންތަކާއި އަދަބީ ހިޔާލުތައް މިޔުޒިކަށް ބަދަލު ކޮށްދޭ ރީތި ފަންނެއް ކަމަށެވެ
ޅެންވެރިންގެ ދުވަސް 1988 ވަނަ އަހަރުގެ ޖެނުއަރީ 15 ވަނަ ދުވަހުން ފެށިގެން ކޮންމެ އަހަރަކު ވެސް މިދުވަހު އަންނަނީ ފާހަގަކުރަމުންނެވެ. މި ދުވަހަކީ އަލްއުސްދާޒު އިބްރާހީމް ޝިހާބް ދެމިއޮތުމުގެ ހާލަމަށް ދަތުރުކުރެއްވި ދުވަހާ ގުޅިގެން ފާހަގަކުރަމުން އަންނަ ދުވަހެކެވެ.
އިބްރާހީމް ޝިހާބަކީ ދިވެހި ޅެންވެރިކަމަށް ގިނަ ހިދުމަތްތަކެއް ކުރެއްވި ޝާއިރެކެވެ. އެގޮތުން އޭނާ ފާހަގަކުރެވިފައި ވަނީ ޝާއިރުލް ޝަބާބްގެ ނަމުންނެވެ.
