އެ ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި، މިނިސްޓަރު އިމްރާން އަތުގައި ހުރި ކަމަށް އެމަނިކުފާނި އަމިއްލައަށް ވިދާޅުވެފައިވާ ރިލްވާން އާއި އަފްރާޝީމްގެ މައްސަލާގެ މުހިންމު ހެކިތައް ނުވަތަ ލިއުންތައް ތަހުގީގަށް ހޯދާނަންތޯ ނޫސްވެރިއަކު ސުވާލުކުރުމުން، އެ ކޮމިޝަންގެ މެންބަރު މިސްބާހު އައްބާސް ވިދާޅުވީ، އެ މައްސަލަތަކާއި ގުޅޭ ގޮތުން ފުލުހުންގެ އަތުގައި ހުރި ހެއްކެތް ކަމުގައި ވީނަމަވެސް ހޯދަންޖެހޭ ހުރިހާ ހެތްކެއް ކޮމިޝަނުން ހޯދާނެ ކަމަށެވެ.
މިސްބާހު ވިދާޅުވީ މި މައްސަލަތަކަކީ މިހާރު ވެސް ތަހުގީގު ހިނގަމުންދާ މައްސަލަތަކަކަށް ވުމާއިއެކު، މި މައްސަލަތަކާއި ގުޅިގެން މިހާތަނަށް ކޮމިޝަނަށް ހާޒިރުކޮށް ސުވާލު ކުރެވުނު ފަރާތްތަކުގެ ވަނަވަރާއި އަދި މިހާތަނަށް ހޯދިފައިވާ ހުރިހާ ހެކީގެ މައުލޫމާތު ހިއްސާ ކުރެވެން ނެތް ކަމަށާއި، ނަމަވެސް މި މައްސަލަތަކުގެ ތަހުގީގަށް ބޭނުންވާ ހެއްކެތް ފުލުހުންގެ އަތުގައި ހުރިކަމުގައި ވިޔަސް ކޮމިޝަނުން އެ ހެތްކެއް ހޯދާނެ ކަމަށެވެ.
މިނިސްޓަރު އިމްރާންގެ އަތުގައި ހުރި ކަމަށް ބުނާ ހެކީގެ ލިއުންތަކަކީ މޭޑޭގެ މުޒާހަރާގައި ދައްކަވާފައިވާ ލިއުންތަކެކެވެ. ނަމަވެސް ފަހުން މިނިސްޓަރު އިމްރާން ވިދާޅުވެފައިވަނީ އެ ދުވަހުގެ މުޒާހަރާގައި ފުލުހުން އޭނާ ހައްޔަރުކުރުމަށް ފަހު އެ ލިއުންތައް އަތުލާފައިވާ ކަމަށެވެ.
