އިމްތިހާޒް މިހެން ވިދާޅުވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާޕާސަން ހަސަން ލަތީފް، މާލޭގައި ޒުވާނުންނަށް ފަސޭހަކަމާއިއެކު މިއުޒިކް އަޑުއަހާލާ އެކުވެރިންނާއި ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީ ސަމާސާކޮށް މަޖާކޮށްލާ އެއްވެ ތިބެވޭނެ ފަދަ މަރުކަޒެއް ގާއިމްކޮށްދިނުމަށް ސަރުކާރަށް ގޮވާލައި ހުށަހަޅާފައިވާ ގަރާރުގެ މިއަދުގެ ބަހުސްގައި ވާހަކަ ދައްކަވަމުންނެވެ.
މިއުޒިކަކީ ޒުވާނުންނާއި ޒުވާނުން ނޫން އެހެން އުމުރުފުރާތަކުގެ މީހުންނާއިވެސް ގުޅި ލާމެހިފައިވާ އެއްޗެއްކަން ފާހަގަކުރައްވައި އިމްތިޔާޒް ވިދާޅުވީ، މިއުޒިކު އަޑުއެހުމާއި، ލަވަޖެހުމާއި، ޅެންހެދުމާއި، މިހިރަ މިހިރަ ކަންކަމަކީ، އެތަކެއް ސަތޭކަ އަހަރެއް ވަންދެން ވަރަށް ކުރީ ޒަމާނުންސުރެއް ރާއްޖޭގަ އޮތް އާދަކާދައެއް ކަމަށާއި، ކުއްލިއަކަށް އެކަން އެއްކޮށް ބަދަލުވުމަކީ އޭގެ ސަބަބުން މުޖުތަމައު އެއްކޮށް ރޫޅޭނެކަމެއް ކަމަށެވެ.
މީގެއިތުރުން އިމްތިޔާޒް ވިދާޅުވީ ލަވައާއި މިއުޒިކުގެ ކަންކަމަކީ ވަރަށް ބޮޑަށް އިހްތިލާފު އުފެދިފަވާކަމެއް ކަމަށާއި، ބައެއް ބޮޑެތި އިލްމުވެރިން މިކަމަށް ތާއީދުކުރައްވައި ވާހަކަ ދައްކަވާފައި އެބަހުރި ކަމަށެވެ. މިސާލު ޖައްސަވަމުން އިމްތިޔާޒް ފާހަގަކުރެއްވީ ޑރ.އަފްރާޝީމް އަލީގެ ނަންފުޅެވެ. އެގޮތުން
އިމްތިޔާޒް ވިދާޅުވީ، އެމަނިކުފާނު އަވަހާރަކޮށްލާފައިވާތީ ހިތާމަކުރާ ކަމަށާއި، މިކަމުގައިވެސް ތުހުމަތުކުރެވެނީ، މިފަދަ އިހްތިލާފު އުފެދިފަވާ ކަންކަމުގެ ތެރެއިން ފިތުނަ އުފައްދައިގެން ނުރައްކަލުގެ ތެރެއަށް އިންސާނާ ވައްޓާލައި ފުރާނަ ދުއްވާލާ ހަމައަށް ދާކަމުގެ ތުހުމަތު ކަމަށެވެ.
މިއީ މި ގަރާރުގެ ބަހުސްގައި އިމްތިޔާޒް ވާހަކަދެއްކެވި ތިންވަނަ ފަހަރެވެ.
