އެއް މިނެޓާ ފަންސަވީސް ސިކުންތުގެ ޓީޒާ އިން އޭނާގެ ކުޅަދާނަކަން ފެންނަކަމަށް ބުނެ ސަޕޯޓަރުން އަންނަނީ ތައުރީފް ކުރަމުންނެވެ.
މިއަހަރު އެންމެ ގިނަ ބަޔަކު އިންތިޒާރުކުރަމުން އަންނަ އެ ފިލްމު ރިލީޒްކުރާނީ މާޗު 26 ގަ އެވެ.
މި ފިލްމު އުފެއްދުމަށް ދިގު މުއްދަތެއް ހޭދަކުރަން ޖެހުނެވެ. އެގޮތުން ސައިނާގެ ރޯލު ކުޅުމަށް ޕަރީނިތީއަށް ގިނަ ކަންތައްތަކެއް ދަސްކުރަން ޖެހުނެވެ. އެ މަސައްކަތް 2019 ވަނަ އަހަރުން ފެށިގެން އޭނާ އައީ ކުރަމުންނެވެ.
އެންމެ ފުރަތަމަ އެ ފިލްމު ކުޅެން ސޮއި ކުރީ ޝްރައްދާ ކަޕޫރެވެ. ނަމަވެސް ރޯލަށް ތައްޔާރުވާން ފެށުމަށް ފަހު އޭނާ ވަނީ މާބޮޑަށް ބިޒީވެ ފިލްމު ދޫކޮށްލަން ނިންމާފަ އެވެ.
ބެޑްމިންޓަން ޗެމްޕިއަން ސައިނާ ވަނީ ބައިނަލްއަގްވާމީ 24 މުބާރާތަކާއި އޮލިމްޕިކުން ބްރޯޒް މެޑަލެއް ހޯދާފަ އެވެ. އޭގެ އިތުރުން ވެސް އޭނާއަކީ ބެޑްމިންޓަން ކުޅުންތެރިންގެ ތެރެއިން އެންމެ ކާމިޔާބު އެއް އަންހެން ތަރިއެވެ.
ޕަރީނިތީ އެންމެ ފަހުން ފެނުނީ ދަ ގާލް އޮން ދަ ޓްރެއިން އިންނެވެ. 26 ފެބްރުއަރީގައި ފިލްމު ރިލީޒްކުރީ ނެޓްފްލިކްސް އިންނެވެ.
