އިއްޔެ ޔޫޓިއުބުން ބުނީ އެ ކުންފުނީގެ ކޮމިއުނިޓީ އުސޫލަށް ބެލުމަށް ފަހު ޗެނަލްތައް މަނާކޮށްފައިވާ ކަމަށެވެ.
ބަގާވާތެއް ކުރުމަށް ފަހު މިޔަންމާގެ އަސްކަރިއްޔާއިން ވަނީ އިންތިހާބީ ލީޑަރުން ހައްޔަރުކޮށް، ވެރިކަމުގެ ބާރުތައް އަތުލާފަ އެވެ. އެކަމާ ދެކޮޅަށް އެ ގައުމުގެ ރައްޔިތުން އަންނަނީ ހުއްޓުމެއް ނެތި މުޒާހަރާ ކުރަމުންނެވެ.
ޔޫޓިއުބުން މަނާކުރި ޗެނަލްތަކުގެ ތެރޭގައި ހިމެނެނީ ދައުލަތުގެ ނެޓްވޯކް މިޔަންމާ ރޭޑިއޯ އެންޑް ޓެލެވިޝަން (އެމްއާރްޓީވީ) އަދި އަސްކަރިއްޔާގެ މިޔަވަޑީ މީޑިއާ، އެމްޑަބްލިއުޑީ ވެރައިޓީ އަދި އެމްޑަބްލިއުޑީ މިޔަންމާ އެވެ.
ޔޫޓިއުބުގެ ތަރުޖަމާނަކު ވިދާޅުވީ ބައެއް ޗެނަލްތައް އެއްކޮށް މަނާކުރިއިރު، އެހެން ބައެއް ޗެނަލްތަކުގައި ހުރި ވީޑިއޯތައް ނަގާފައިވާ ކަމަށެވެ.
ޔޫޓިއުބު ހިންގަނީ އެލްފަބެޓް ކުންފުނިންނެވެ. ގޫގްލް ވެސް ހިންގަނީ އެ ކުންފުނީގެ ދަށުންނެވެ.
ބަގާވާތަށް ފަހު މިޔަންމާގެ ހާލަތު ގޯސްވެފައި ވާއިރު، އަސްކަރިއްޔާގެ އެންގުންތައް އަމަލު ކުރަން ދެކޮޅު ހަދަމުންދާ ފުލުހުން އަންނަނީ ރެފިއުޖީންގެ ގޮތުގައި ބޯޑަރު ހުރަސްކޮށް އިންޑިއާއަށް ދަތުރު ކުރަމުންނެވެ.
އޭގެ އިތުރުން ކޮންމެ ދުވަހަކު ވެސް ބާއްވަމުންދާ އެއްވުންތަކުގެ ތެރެއިން މިދިޔަ ބުދަ ދުވަހަކީ އެންމެ ލޭ އޮހޮރުވުން ގިނަ ދުވަހެވެ. އެ ދުވަހު 38 މީހަކު މަރުވެފައި ވެއެވެ.
ޔޫޓިއުބުގެ އިތުރުން ފޭސްބުކްއިން ވެސް ވަނީ މިޔަންމާގެ އަސްކަރިއްޔާއާ ދެކޮޅަށް ފިޔަވަޅު އަޅާފަ އެވެ. އެގޮތުން އަސްކަރިއްޔާގެ ހުރިހާ ފޭސްބުކް ޕޭޖެއް ވަނީ މަނާކޮށްފަ އެވެ.
