މަޖިލީހުން ބުނީ ރައްޔިތުންގެ މަޖިލީހުގެ ދިހަ މެންބަރުން ސޮއިކުރައްވާ ހުށަހަޅުއްވާފައިވާ، ފިޝަރީޒް މިނިސްޓަރުގެ ޒަހާ ވަހީދުގެ އިތުބާރު ނެތްކަމުގެ މައްސަލައިގެ ނޯޓިސް، މިއަދު އެކަމަނާއަށް ފޮނުވާފައިވާ ކަމަށެވެ.
އެ މައްސަލަ މަޖިލީހަށް އިއްޔެ ވައްދާފައިވަނީ މަޖިލީހުގައި ހިމެނޭ އިދިކޮޅު ކޯލިޝަންގެ 8 މެމްބަރުންނާއި، މިނިވަން ދެ މެމްބަރެއްގެ ސޮޔާއިއެކު އެވެ. މިނިވަން މެމްބަރުންގެ ތެރެއިން ސޮއިކުރެއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދާއި، ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ.
މިނިސްޓަރު ޒަހާގެ އިތުބާރު ނެތްކަމަށް މަޖިލީހަށް ވެއްދީ މަސްވެރިކަމުގެ ސިނާއަތުގައި މަސައްކަތް ކުރަމުންދާ ދިވެހި މަސްވެރިންނާއި މަސްވެރި އާއިލާތަކަށް މިސަރުކާރުން ވެފައިވާ ވައުދުތައް ފުއްދުމަށް ކުރަންޖެހޭ މަސައްކަތްތައް ނުކުރެވި، މަސްވެރިންނަށް ދޭންޖެހޭ ހިދްމަތްތައް ނުދެވިވާތީ ކަމަށް ބުނެ އެވެ.
އަދި ސަރުކާރުން މަސްވެރިކަމުގެ ދާއިރާއަށް ވެފައިވާ އެއްވެސް ވައުދެއް ފުއްދާފައި ނުވުމާއި ރާއްޖޭގެ ކަނޑުތަކުގައި ދިވެހި މަސްވެރިންނަށް މަސްވެރިކަން ކުރުމުގެ ފުރުސަތު ވެސް ބޭރުގެ ބޯޓު ފަހަރުތަކާއި ހެދި ހަނިވެފައިވާކަމަށް ވާތީ ވެސް ބުނެފައި ވެއެވެ.
އެކަމަނާ ނިސްބަތްވެވަޑައިގަންނަވާ އެމްއާރުއެމް އިން ވަނީ ޒަހާގެ ދިފާއުގައި ނިކުމެފަ އެވެ. އަދި މިނިސްޓަރު ޒަހާއަށް ފުރިހަމަ އިތުބާރު އޮތް ކަމަށް ބުނެފައިވެ އެވެ.
