ދެ މުސާރަ ނަންގަވާ މައްސަލަކަމަށް މަލީހް އިޝާރާތް އެ ކުރައްވަނީ ނަޝީދަށް ލިބިވަޑައިގަންނަވާ ކުރީގެ ރައީސުންނަށް ދެވޭ އިނާޔަތުގެ އިތުރުން މަޖިލީސް ރައީސްގެ މުސާރައާއި އިނާޔަތަށެވެ.
މަލީހް ކުރެއްވި ޓްވީޓެއްގައި ވަނީ ރައީސް ނަޝީދަކީ "ދެ މުސާރަ ތަކުރު" ގެ ގޮތުގައި ސިފަ ކުރައްވާފަ އެވެ. އަދި ވިދާޅުވީ، ދެ މުސާރަ ނަންގަވާ މައުލޫމާތު ރައީސް ނަޝީދަށް ދެން ފޮރުވައިގެން ނުހުރެވޭނެ ކަމަށާއި ރައިޓް ޓު އިންފޮމޭޝަންގެ ދަށުން މާދަމާ މަޖިލީހަށް އެ މައްސަލަ ހުށަހަޅާނެ ކަމަށެވެ.
މަލީހް ވަނީ މަޖިލިސް މެންބަރު/ރައީސް އަދި ކުރީގެ ރައީސްގެ ހައިސިއްޔަތުން ނަގާ މުސާރަ އަދި އިނާޔަތުގެ ތެރެއިން ކޮންމެވެސް އެކައްޗެއް ރައްޔިތުންގެ ހައްގުގައި ދޫކޮށްލުމުގެ ގަޓު ހުންނާނެތޯ ސުވާލު އުފައްދަވާފަ އެވެ.
މަލީހް އިތުރަށް ވިދާޅުވެފައި ވަނީ ފެންނާން ހުރި މަދު ރޯ މައުލޫމާތުތަކަށް ބަލާއިރު ރައްޔިތުންގެ އަތުން މަހަކު 265419.70 ރުފިޔާ ރައީސް ނަޝީދު ނަންގަވާ ކަމަށެވެ. އަދި އޭގެ ތަފްސީލް ބްރޭކް ޑައުން ހޯދާ އަދި ހާމަ ނުކޮށް ހުރިކަންކަން ފަޅާ އަރުވާނެކަން ފާހަގަކުރައްވަމުން މަލީހް ވިދާޅުވީ އެއީ މަހަކު 17 މީހުން ފަގީރުކަމުން މިންޖުވާހާ ފައިސާ ކަމަށެވެ.
އޭގެ އިތުރުން މަލީހް ވިދާޅުވީ ފަސް އަހަރުގެ ދައުރެއްގައި 2.5 އަހަރު ރައީސްކަން ކުރުމަށް ފަހު ފައިސާ ނެގުމަކީ ރައްޔިތުންނަށް ގައްދާރުވުން ކަމަށެވެ.
ރައީސުލްޖުމްހޫރިއްޔާއަށް ވުރެ ދެގުނަ ބޮޑުކޮށް ރައީސް ނަޝީދު، ނަންގަވަމުންދާތީ އެކަމާއި ނުރުހުން ފާޅުކުރެއްވި އެވެ.
