މަޑުއްވަރި ސިއްހީ މަރުކަޒުން ނެރުނު އިއުލާނެއްގައި ބުނެފައިވަނީ، އެރަށުން ޕޮޒިޓިވްވެފައި ވަނީ މިމަހު ދެވަނަ ދުވަހު އެއަތޮޅު އުނގޫފާރަށް ދަތުރުކުރި މީހެއް ކަމަށެވެ.
އެގޮތުން ރަށް މޮނީޓަރިންގެ ހާލަތަށް ގެނެސްފައިވަނީ މިއަދު ކަމަށާއި، ކޮންޓެކްޓް ޓްރޭސިންގެ މަސައްކަތް މިހާރު ކުރަމުން އަންނަ އިރު އެއްވެސް ރައްޔިތަކު ބޭރަށް ނުނިކުތުމަށް މި އިއުލާނުގައި އެދިފައި ވެއެވެ.
މީގެ އިތުރުން، ރަށް މޮނީޓަރިންގެ ހާލަތުގައި އޮތުމާއެކު ހެލްތު ސެންޓަރުން ކޮންސަލްޓޭޝަންގެ ހިދުމަތް ދެމުން ގެންދާނީ އޮންލައިންކޮށް ކަމަށް މިއިއުލާނުގައި ބުނެފައިވެއެވެ. އަދި ޑޮކްޓަރަށް ދައްކަން ބޭނުންވާ ފަރާތްތަކުން 7214669/6580394 އަށް ގުޅައިގެން ކުރިއަށް ގެންދިއުމަށް މަޑުއްވަރި ސިއްހީ މަރުކަޒުން އެދިފައިވެއެވެ.
މަޑުއްވަރި ސިއްހީ މަރުކަޒުން ވަނީ އެމަޖެންސީ ހާލަތެއްގައި ނޫން ގޮތަށް ހިދުމަތް ހޯދުމަށް ހެލްތު ސެންޓަރަށް ނައުމަށް އިލްތިމާސް ކޮށްފައެވެ.
އުނގޫފާރުގައި ކަރަންޓީނުގައި ނެތް މީހަކު ޕޮޒިޓިވްވެ، އެރަށް މޮނިޓަރިންއަށް ލާފައި ވަނީ މިމަހުގެ 19 ވަނަ ދުވަހު އެވެ. އަދި އުނގޫފާރަށް މިމަހު ދޭއްގެ ފަހުން ދަތުރުކުރި މީހުން ކަރަންޓީނު ވުމަށް އެޗްޕީއޭއިން އަންގާފައިވާއިރު، އުނގޫފާރު ކްލަސްޓާއާއި ގުޅިގެން ޅ. ނައިފަރުވެސް ވަނީ މޮނީޓަރިންގެ ހާލަތަށް ގެނެސްފައެވެ.
