ދިރާގު ޕޭ އިން ބޭނުން ކުރަން ފަސޭހަ، ޕޮއިންޓު އޮފް ސޭލްސް (ޕީ.އޯ.އެސް) ސިސްޓަމެއް ކަމުގައިވާ ފިއެސް IdzLink އާ އިންޓަގްރޭޓް ކޮށްފިކަމަށް ދިރާގުން ބުނެފިއެވެ.

ދިރާގުން ބުނި ގޮތުން، މިހާރު ފަސޭހަކަމާއެކު ދިރާގުގެ ކަސްޓަމަރުންނަށް IdzLink ގެންގުޅޭ ރީޓެއިލް ފިހާރަތަކުގައި ފައިސާ ދައްކާލެވޭނެ އެވެ. 

މީގެ އިތުރުން، އޮންލައިން ކޮށް ވިޔަފާރި ކުރާ ކަސްޓަމަރުންނަށްވެސް މި ޕީ.އޯ.އެސް މެދުވެރިކޮށް ދިރާގު ޕޭ އިން ފައިސާ ދެއްކޭނެ ކަމަށް ދިރާގުން ބުނެއެވެ. އަދި ފައިސާ ދެއްކުމަށް ސޭލް ނިމުމާއެކު، ދިރާގު ޕޭ އިހުތިޔާރު ކުރުމުން، ކަސްޓަމަރުގެ ފޯނަށް އޯޓީޕީ އެއް ލިބޭނެކަމަށާއި އޯޓީޕީ ދިނުމާއެކު ފައިސާ ދެއްކުނީކަމަށް ދިރާގުން ބުނެއެވެ. ހަމައެއާއެކު، ދިރާގު ބިލް އަދި ރީލޯޑް ފަދަ ކަންތައްތައް ކުރުމަށްވެސް ފިހާރަތަކުން ފިއެސްގެ ހިދުމަތް ބޭނުން ކުރެވޭނެ ކަމަށް ދިރާގުން ބުނެއެވެ.

ދިރާގުގެ އަމާޒަކީ ދިރާގުޕޭ ވީހާވެސް ގިނަ މިފަދަ ޕްލެޓްފޯމް ތަކުގައި ބޭނުން ކުރެވޭނެ މަގު ފަހި ކުރުން ކަމަށް ދިރާގު ޕްރޮޑަކްޓް މެނޭޖާ، މޮބައިލް މަނީ އެންޑް ޑިޖިޓަލް ކޮމާސް މުހައްމަދު ނަހުޝަން ވިދާޅުވިއެވެ. 

ފިއެސް އާ ބެހޭ އިތުރު މައުލޫމާތު ދެމުން ދިރާގުން ވަނީ، ފިއެސް އަކީ ރާއްޖޭގެ ސޮފްޓުވެއާގެ ހިދުމަތް ފޯރުކޮށްދޭ އެންމެ ބޮޑު ކުންފުންނި ކަމަށް ބުނެފައެވެ.

މީގެ އިތުރުން މިހާރު ފިއެސްގެ ހިދުމަތްތައް ބޭނުން ކުރާ ރާއްޖޭގެ ބޮޑެތި ވިޔަފާރިތައް ކަމަށްވާ އަގޯރާ، ސިމްޑީ ކޮމްޕެނީ، އެލިއާ އިންވެސްޓްމެންޓް، ނަލަހިޔާ ޓްރޭޑިންގް، ރިލެކްސް މޯލްޑިވްސް، ނޮލެޖް ބުކްޝޮޕް، ޗާންދަލިއާ ބުކްޝޮޕް، ޓެޕް ކޮންސްޓްރަކްޝަން، އެލް މޯބައިލް، ޕޭޖް ހާޑްވެއަ، ވެލިގާ ހާޑްވެއަ، ފިނޯ، ފޯކަސް ކޮމްޕިއުޓާ، ރެފްކޫލް، މުނި އެންޓާޕްރައިސް، ޝީޝާ، ސީލިންކް، ފްރީގާއިސް، އިންނަ މޯލްޑިވްސް އަދި އޭސް ޓްރެވަލް ހިމެނެއެވެ.