ރަސްފަންނު ސަރަހައްދުގައި 1 މޭ ވާ ހޮނިހިރު ދުވަހުގެ ރޭގަނޑު 20:45 ޖަހާއިރު ބޭއްވުމަށް ހަމަޖެހިފައިވާ މި އެއްވުމަކީ މަސައްކަތު މާހައުލުގައި ކުރިމަތިވާ ޖިންސީ އެކި ކަހަލަ އަނިޔާތަކާއި، ފުރައްސާރައިގެ މައްސަލަތަކަށް އިންސާފު ލިބުން ލަސްވުމާއި ގުޅިގެން އަޑުއުފުލުމުގެ ގޮތުން ބާއްވާ ސުލްހަވެރި އެއްވުމެކެވެ.
މި އެއްވުން އިންތިޒާމު ކުރާ ފަރާތް ކަމަށްވާ "ރައިޒް އަޕް" މޫވްމެންޓްގެ ފަރާތުން ބުނީ މި އެއްވުމުގައި ބައިވެރިންގެ އިހުސާސްތަކާއި ޝުއޫރުތައް ފާޅުކުރުމުގެ އިތުރުން ބައެއް ކަންކަމަށް ޑިމާންޑް ކުރުމަށް ހަމަޖެހިފައިވާ ކަމަށެވެ. އެގޮތުން މަސައްކަތު މާހައުލުގައި އުޅޭ އަންހެނުންގެ ރައްކާތެރިކަން ކަށަވަރު ކުރުމާއި ކުށްވެރިން އިންސާފުގެ ކުރިމައްޗަށް ގެނެސް އިންސާފު ގާއިމް ކުރުމަށް ގޮވާލުން ހިމެނެއެވެ.
"ރައިޒް އަޕް" މޫވްމެންޓްގެ ފަރާތުން ވަނީ ނިމިދިޔަ ހަފުތާގެ ހޮނިހިރު ދުވަހު ވެސް އެއްވުމެއް ބާއްވާފައެވެ. އެ އެއްވުމުގައި ރޭޕް ކުރުމާއި ދެކޮޅަށް އެއްވުމުގެ ބައިވެރިންވަނީ ގޮވާލާ، ޝުއޫރުތައް ފާޅު ކޮށްފައި ވާއިރު، އެއްވުމުގައި ގިނަ އަދަދެއްގެ ޒުވާނުން ވަނީ ބައިވެރި ވެފައެވެ.
"ރައިޒް އަޕް" މޫވްމެންޓަކީ ޖިންސީ ގޯނާތަކާއި ފުރައްސާރައާއި ދެކޮޅަށް އަޑު އުފުލުމަށް ޒުވާނުން އިސްވެ ކުރިޔަށް ގެންދާ ހަރަކާތެކެވެ.
މި އެއްވުން މަސައްކަތް ތެރިންގެ ދުވަހު ބާއްވަން ނިންމާފައި ވާއިރު، ޓޫރިޒަމް މިނިސްޓްރީގެ އަންހެން މުވައްޒަފުން ތަކަކަށް ކުރީގެ ޓޫރިޒަމް މިނިސްޓަރު އަލީ ވަހީދު، ޖިންސީ އަނިޔާ ކުރި މައްސަލަ ތަކާއި ގުޅިގެން ގިނަ ދައުވާތަކެއް އުފުލައިފައި ވަނިކޮށް ބޭސް ފަރުވާއަށް ކަމަށް ބުނެ އަލީ ވަހީދު ވަނީ ގައުމުން ފިލައިގެން ގޮސްފައެވެ. ރާއްޖޭގައި ރޭޕް ކުރުމާއި، ޖިންސީ ފުރައްސާރައިގެ މައްސަލަތައް މިފަހަކަށް އައިސް އަންނަނީ އިތުރުވަމުންނެވެ.
