ރައީސް އޮފީހުން ބުނިގޮތުގައި އާއިޝަތު ރަޝީދު ކުރިން ހުނެވީ ޖެންޑަ މިނިސްޓްރީގެ ސްޓޭޓް މިނިސްޓަރުގެ މަގާމުގަ އެވެ. އަދި ޢަބްދުއްޝުކޫރު ޢަބްދުލްހަކީމް ހުންނެވީ ޖެންޑަ މިނިސްޓަރުގެ ނައިބުގެ މަގާމުގަ އެވެ.
އެ ދެ ބޭފުޅުން ހެލްތު މިނިސްޓްރީއަށް އައްޔަނުކުރެއްވި އިރު ޖެންޑަ މިިނިސްޓްރީގެ ދަށުން ކުރިން ހިންގަމުންގެންދިޔަ ނޭޝަނަލް ޑްރަގް އެޖެންސީ (އެންޑީއޭ) ވަނީ ހެލްތު މިނިސްޓްރީގެ ދަށަށް ބަދަލުކޮށްފަ އެވެ.
ހެލްތު މިނިސްޓްރީގެ ދަށަށް އެންޑީއޭ ބަދަލުކުރި އިރު، އެތަނުގެ ހިންގުމާ މެދު ބޮޑެތި ފާޑުކިޔުންތަކެއް ސަރުކާރަށް އަމާޒުވެ، އެ މައްސަލާގައި ޒުވާނުންތަކެއް ވަނީ މުޒާހަރާ ވެސްކޮށްފަ އެވެ.
ނޭޝަނަލް ޑްރަގް އެޖެންސީގެ ހިންގުމަށް ރައީސް ބަދަލު ގެންނަވާފައިވާކަން އިއުލާން ކުރެއްވަމުން ރައީސް އޮފީހުގެ ތަރުޖަމާނު ވިދާޅުވީ މިއީ ސަރުކާރުގެ ވައުދުތައް ފުއްދުމަށާއި ރައްޔިތުންނަށް ދެވޭ ހިދުމަތްތައް އިތުރަށް ފުރިހަމަ ކުރުމުގެ ގޮތުން ގެނެވޭ ބަދަލުތަކެއް ކަމަށެވެ.
