ބަނޑިދޫ ކައުންސިލް ރައީސް ހަސަން ހަނީފް ސީއެންއެމް އަށް ވިދާޅުވީ ރަށުން ކަރަންޓީނުގައި ތިބި ހަ މީހުންގެ އާއިލާއެއް މީގެ ހަތަރު ދުވަސް ކުރިން ވަނީ ކޮވިޑަށް ޕޮޒިޓިވްވެފައި ކަމަށެވެ. އަދި އެމީހުންނަށް ކާއެއްޗިހި ގެންދާ ތިމާގެ މީހެއްގެ ގައިން ރޯގާގެ އަލާމާތްތަށް ފެނަން ފެށި ކަމަށް ހަނީފް ވިދާޅުވި އެވެ.
އަދި ރަށުގައި އެހެން މީހުންގެ ފަރާތުންވެސް ރޯގާގެ އަލާމާތްތައް ފެނުމުގެ ސަބަބުން އިއްޔެ ބަނޑިދޫއިން 10 ރެންޑަމް ސާމްޕަލެއް ނަގާފައިވާ ކަމަށް ހަނީފް ވިދާޅުވި އެވެ. އިއްޔެ ނެގި ސާމްޕަލްތަކުގެ ތެރެއިން ނަތީޖާ ލިބިފައިވަނީ ފަސް މީހެއްގެ ކަމަށާއި އޭގެތެރެއިން އެކަކު މީހާރު ޕޮޒިޓިވްވެފައިވާ ކަމަށް ހަނީފް ވިދާޅުވި އެވެ.
ހަނީފް ވިދާޅުވީ މިހާރު ކޮންޓެކްޓްރޭސިންގެ މަސައްކަތް ކުރަމުން އަންނަ ކަމަށާއި އަށް ގެއެއް މީހާރު ވަނީ މޮނިޓަރިންގެ ހާލަތަށް ލާފައި ކަމަށެވެ. އަދި އިތުރު ސާމްޕަލް ނެގުމުގެ މަސައްކަތް ކުރަމުން އަންނަ ކަމަށް ވެސް ހަނީފް ވިދާޅުވި އެވެ.
ރަށް އަދި މޮނިޓަރިންގެ ހާލަތަށް ނުލާކަމަށް ވެސް ހަނީފް ވިދާޅުވި އެވެ.
އިއްޔެ ރާއްޖޭއިން 1،572 މީހަކު ކޮވިޑަށް ޕޮޒިޓިވެފައިވާ އިރުގައި 1،315 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި 242 މީހުން އަތޮޅުތެރެއިން ޕޮޒިޓިވްވި އިރު ރިސޯޓުތަކުން އިއްޔެ 15 މީހުންނަށް މި ބަލި ޖެހިފަވެއެވެ.
