އުމަރު ނަސީރުގެ ކައިވެންޏަށް 25 އަހަރު ފުރުމުގެ މުނާސަބަތުގައި ސޯޝަލް މީޑިއާއަށް ދޫކޮށްލި ޕޯސްޓުގައިވެސް ކިޔައިދެނީ ސިޔާސީ ގޮތުން އެއް އިރެއްގައި ހޯމް މިނިސްޓަރު ކަމުގެ ކޯޓު ތުރުކުރެއްވި ނަމަވެސް އެމަނިކުފާނުގެ ހޯމް މިނިސްޓަރަކީ އަނބިމީހާ ކަމެެވެ.
ކައިވެންޏަށް 25 އަހަރު ފުރޭ އުފާވެރި ދުވަހުގެ ހެޔޮއެދުންތައް ލޯބިވާ އަނބިމީހާއަށް ފޮނުވަމުން އުމަރު ވިދާޅުވެފައިވަނީ، އެމަނިކުފާނުގެ ބޯ ކޮށަންވާ ގޮތާ، އަޅަންވާ ހެދުމާ، ޖަހަންވާ ސެންޓް ވެސް ނިންމަނީ އަނބިމީހާ ކަމަށެެވެ.
އަދި އެމަނިކުފާނުގެ މަންމަ، އެމަނިކުފާނަށްވުރެ ބޮޑަށް އަނބިމީހާ ދެކެލޯބިވާ ކަމަށާއި ދަރިންނާ، ދަނބިދަރިން ވެސް އެމަނިކުފާނަށް ވުރެ ބޮޑަށް އެމަނިކުފާނުގެ އަނބިމީހާދެކެ ލޯބިވާ ކަމަށެެވެ.
އުމުރުން 54 އަހަރުގެ އުމަރު ނަސީރަކީ އަލްމަރްހޫމް ބޮޑިބަތް ދޮންކަލޭފާނާއި ހުސްނާ އާދަމް އަށް ލިބިވަޑައިގެންނެވި ތިން ދަރިންގެ ތެރެއިން އެންމެ ހަގު ދަރިފުޅެވެ.
ބާސްކެޓުކުޅުމަށް ޝައުގުވެރިކަން ހުންނަ އުމަރު އެމަނިކުފާނުގެ ހަޔާތުގެ ބައިވެރިޔާ އަދި އަނބިކަބަލުންނާއި ދިމާވަނީވެސް ބާސްކެޓުގެ ތެރެއިންނެވެ. ކޯޗުކަން ކޮށްދެނިކޮށް ދިމާވިގޮތައް ކައިވެނި ބައްލަވައިގަނެ މިހާރު އެކައިވެންޏަށް 25 އަހަރު ވީއިރު، މިހާރު އުމަރުގެ ހަތަރު ދަރިން ތިބެއެވެ. އެންމެ ދޮށީ ދަރިއަށް 23 އަހަރު ފުރިނުއިރު އެންމެ ހަގު ކުއްޖާއަށްވީ 11 އަހަރެވެ.
