ފުލުހުން މިހެން ބުނެފައިވަނީ، އަދިވެސް އަންހެން ކުއްޖާއަށް އިންޒާރު ދިނުން ހުއްޓާ ނުލާ ކަމަށް ބުނެ އަންހެން ކުއްޖާގެ އާއިލާގެ ފަރާތުން މި ހާދިސާގެ މައުލޫމާތު ސޯޝަލް މީޑިއާގައި ހިއްސާ ކޮށްފައިވާ ދަނޑިވަޅެއްގައެވެ.
އެގޮތުން މި މައްސަލައިގެ ތަހުގީގުގައި ފޮރެންސިކް ހެއްކާއި ގަރީނާ ހޯދާފައިވާ ކަމަށް ފުލުހުން ބުނެއެވެ. އަދި މި މައްސަލަ ޕީޖީ އޮފީހަށް ފޮނުވުމަށް ކުރަންޖެހޭ އެންމެ ފަހުގެ މަސައްކަތްތައް ކުރަމުން އަންނަ ކަމަށް ފުލުހުން މައުލޫމާތު ދެއެވެ.
މިއާއެކު މި ކުއްޖާގެ ރައްކާތެރިކަން ކަށަވަރުކޮށް، އޭނާއަށް ބޭނުންވާ އެހީތެރިކަން ފޯރުކޮށްދިނުމަށް އަޅަންޖެހޭ ފިޔަވަޅުތައް އަޅާފައިވާ ކަމަށް ފުލުހުން މައުލޫމާތު ދެއެވެ.
އެ އަންހެން ކުއްޖާގެ އާއިލާގެ ފަރާތުން ސޯޝަލް މީޑިއާގައި ވަނީ، އަންހެން ކުއްޖާ ބްލެކްމެއިލްކޮށް، އަންހެން ކުއްޖާ ގޭންގް ރޭޕް ކުރާނެ ކަމަށް ބުނެ އޭނާއަށް ބިރު ދައްކަމުން އައި މީހާގެ މައުލޫމާތު އާންމު ކޮށްފައެވެ. އަދި މި ގޮތަށް ކަންކުރަން ޖެހުނީ، ފުލުހުންނަށް މައްސަލަ ހުށަހެޅުމަށް ފަހުވެސް، އިންޒާރުތަކަށް ހުއްޓުމެއް ނައިސް، މި ކަމަށް ހައްލެއް ނުލިބިގެން ކަމަށް އާއިލާއިން ބުނެފައިވެއެވެ.
އެގޮތުން އަންހެން ކުއްޖާއަށް އިންޒާރުދީ ފޮނުވާފައިވާ މެސެޖުތަކުގެ ސްކްރީން ޝޮޓެއްގެ އިތުރުން، ފޯނު ރިކޯޑިންގް އެއްވެސް އަންހެން ކުއްޖާގެ އާއިލާއިން ވަނީ ސޯޝަލް މީޑިއާގައި ހިއްސާކޮށްފައެވެ. އަދި އެ އަންހެން ކުއްޖާގެ އިތުރުން، އާއިލާގެ އެކި މީހުންނަށް މި މައްސަލައިގެ ތުހުމަތު ކުރެވޭ މީހާގެ ގޯނާއާއި އުނދަގޫ ކުރިމަތިވާ ކަމަށް ބުނެފައިވެއެވެ.
