ޓައިމްސް އޮފް އިންޑިއާއިން ރިޕޯޓުކޮށްފައިވާ ގޮތުގައި ޖަންމޫ ކަޝްމީރު ބޯޑަރު ކައިރިއަށް އަކްޝޭ ވަނީ މިދިޔަ ބުރާސްފަތި ދުވަހު ޒިޔާރަތްކޮށްފައެވެ.
މި ދަތުރުގައި އަކްޝޭ ވަނީ އެ ސަރަހައްދުގައި ސުކޫލެއް އެޅުމަށްޓަކައި އެއް ކުރޯޑް އިންޑިއަން ރުޕީސް ހަދިޔާކޮށްފައެވެ. ކަޝްމީރުގެ ބަންޑޯރާ ސަރަހައްދުގައި އިމާރާތްކުރާ މި ސުކޫލަށް ނަން ދިނުމަށް ހަމަޖެހިފައިވަނީ އަކްޝޭގެ ބައްޕަ ހަރި އޯމްގެ ނަމުންނެވެ.
މި ސަރަހައްދަށް ބުރާސްފަތި ދުވަހު އަކްޝޭ ޒިޔާރަތްކޮށްފައިވަނީ ހެލިކޮޕްޓަރުގައެވެ. މި ދަތުރުގައި އޭނާ ވަނީ އެ ސަރަހައްދުގައި ދިރިއުޅޭ ގިނަ އަދަދެއްގެ އާންމު ރައްޔިތުންނާ ބައްދަލުކޮށްފައެވެ.
އަކްޝޭ މިހާރު ކުރަމުން އަންނަނީ ޖެކްލިން ފަރްނެންޑާސް އާއި ނުޝްރަތު ބުޝްރީ އާއެކު ފެނިގެންދާ "ރާމް ސޭތޫ" ގެ މަސައްކަތެވެ. މީގެ އިތުރުން އަކްޝޭގެ ހައުސްފުލް 5، ބައްޗަން ޕާންޑޭ، އަތްރަންޖީ ރާއީ، އަދި ބެލް ބޮޓޮމްއަކީ ވެސް ކުރިއަށް ރޭވިފައި ހުރި މަސައްކަތްތަކެވެ.
