ރޯޔަލް ހަސަން ތަކުރު ކިޔާ އެކައުންޓަކުން ކުރި ޓްވީޓެއްގައި ބުނީ، އިންޑިއާގެ ހައިކޮމިޝަން ގޮއްވާލަން "އާރްޑީއެކްސް" ބޭނުންވާ ކަމަށާއި އަދި އެކަން ވަރަށް އަވަހަށް ކުރާނެ ކަމަށެވެ.
މިމައްސަލައާ ގުޅިގެން ކޯޓު އަމުރުގެ ދަށުން ހައްޔަރުކުރީ ވެރިކަންކުރާ މައި ޕާޓީ އެމްޑީޕީގެ މެންބަރެެއް ކަމަށްވާ އުމުރުން 42 އަހަރުގެ މުހައްމަދު އިނާދެވެ.
އެ ޓްވީޓް ކުށްވެރިކޮށް އެމްޑީޕީން ނެރުނު ބަޔާނެއްގައި ވަނީ އޭނާއަށް ފިޔަވަޅު އަޅައި ޕާޓީން ވަކިކުރަން ނިންމާފައިވާ ކަަމަށް ބުނެފައެވެ.
އެމްޑީޕީން އެބަޔާނުގައި ބުނެފައިވަނީ، ނިރުބަވެރިކަން ފަދަ ބޮޑެތި ކުށްތަކަކީ އެޕާޓީން އެއްވެސް މިންވަރަކަށް ބަލައިގަންނާނެ ކަންކަން ނޫން ކަމަށާއި އަދި މިފަދަ ނުރައްކާތެރި ކަންކަން ކުރާނެ ކަމުގެ އިންޒާރުދީ، އަދި މީހުންނަށާއި، މުދަލާ ތަކެއްޗަށް ގެއްލުން ދިނުމަށް ގޮވާލާ މިފަދަ ކުށްތަކަށް ތަރުހީބު ދިނުމަކީ ޖިނާއީ ކުށެއްކަމުން، މިފަދަ ކުށްތަކަށް އަރައިގަންނަން އިންޒާރުދީ، އަދި ހިތްވަރުދޭ ފަރާތްތަކާ މެދު އަވަސް އަދި ފުރިހަމަ ތަހްގީގެއް ހިންގާ، ކުށްވެރީންނަށް ހައްގު އަދަބު ލިބެން ޖެހޭ ކަމަށް އެ ޕާޓީން ބުންޏެވެ.
މި ޓުވީޓާއި ގުޅިގެން އިންޑިއަން ހައި ކޮމިޝަން އަދި ޗައިނާ އެމްބަސީގެ ސެކުރިޓީވަނީ ވަރުގަދަ ކޮށްފައެވެ.
